अमेरिकामा ५ लाख ३० हजार आप्रवासीको अस्थायी कानुनी मान्यता खारेज हुने

द नेप्लिज संवाददाता

९ चैत २०८१, शनिबार

वासिङटन — अमेरिकी राष्ट्रपति डोनाल्ड ट्रम्प प्रशासनले क्युबा, हाइटी, निकारागुआ, र भेनेजुएलाका ५ लाख ३० हजारभन्दा बढी आप्रवासीको अमेरिकामा बसोबास गर्ने अस्थायी कानुनी मान्यता खारेज गर्ने निर्णय गरेको छ । अमेरिकी संघीय सरकारले सूचना जारी गर्दै ती आप्रवासीलाई आगामी २४ अप्रिलअघि देश छाड्न चेतावनी दिएको छ ।

यी आप्रवासीहरूलाई पूर्वराष्ट्रपति जो बाइडनको कार्यकालमा ’सीएचएनभी’ (क्युबा, हाइटी, निकारागुआ, र भेनेजुएला) आप्रवासन योजनाअन्तर्गत अमेरिका प्रवेश गर्न अनुमति दिइएको थियो । यो कार्यक्रम सन् २०२२ मा बाइडन प्रशासनले दक्षिणी अमेरिकी सीमामा अवैध क्रसिङ रोक्न र अमेरिका प्रवेश गर्नेहरूको राम्रो जाँच गर्न सुरू गरेको थियो । तर ट्रम्प प्रशासनले यो कार्यक्रम असफल भएको जनाउँदै खारेज गर्ने निर्णय गरेको हो ।

आन्तरिक सुरक्षा मन्त्रालयले ’सीएचएनभी’ कार्यक्रमले अमेरिकी कामदारहरूको रोजगारीमा कटौती गरेको र कार्यक्रमको प्रचार गर्दा ठगी पहिचान हुँदा पनि निजामती कर्मचारीहरूलाई बाध्य पारेको आरोप लगाएको छ । यद्यपि संघीय दर्तामा भएको ३५ पृष्ठको सूचनामा ’सीएचएनभी’ अन्तर्गत अमेरिकामा रहेका केहीलाई व्यक्तिगत अवस्थाका आधारमा अनुमति दिइने उल्लेख छ।

बीबीसीका अनुसार राष्ट्रपति ट्रम्पले रुससँगको द्वन्द्वको समयमा अमेरिका आएका करिब २ लाख ४० हजार युक्रेनीको अस्थायी कानुनी स्थिति रद्द गर्ने कि नगर्ने भन्ने विषयमा पनि विचार गरिरहेका छन् । यस निर्णयले प्रभावित आप्रवासीहरूको भविष्य अन्योलमा परेको छ भने आप्रवासी अधिकारकर्मीहरूले यस कदमको आलोचना गरेका छन् ।

प्रकाशित : ९ चैत २०८१, शनिबार 17:47