दक्षिण कोरियामा संवैधानिक अदालतद्वारा कार्यवाहक राष्ट्रपति हान डक–सू पुनर्बहाली

द नेप्लिज संवाददाता

११ चैत २०८१, सोमबार

विराटनगर– दक्षिण कोरियाको संवैधानिक अदालतले कार्यवाहक राष्ट्रपति हान डक–सूमाथि संसद्ले लगाएको महाभियोग खारेज गर्दै उनलाई पुनर्बहाली गरेको छ । महाभियोगको प्रस्तावमा आवश्यक दुई–तिहाइ बहुमत नपुगेको र पर्याप्त आधार नभएको ठहर गर्दै अदालतले यो निर्णय गरेको हो ।

यसअघि राष्ट्रपति यून सुक–योलले डिसेम्बर ३ मा सैनिक शासन (मार्शल ल) घोषणा गरेका थिए जसलाई संसद्ले केही घण्टामै उल्ट्याएको थियो । यसपछि संसद्ले उनलाई महाभियोग लगाएको थियो । यूनको महाभियोगपछि प्रधानमन्त्री रहेका हान डक–सू कार्यवाहक राष्ट्रपति बनेका थिए । तर हानले संवैधानिक अदालतमा न्यायाधीशहरूको नियुक्ति रोकेर यूनको महाभियोग प्रक्रिया अवरुद्ध गरेको आरोपमा संसद्ले उनलाई पनि महाभियोग लगाएको थियो ।

अदालतको निर्णयपछि हानले धन्यवाद ज्ञापन गर्दै आफू निलम्बनमा रहँदा मन्त्रीहरूले कडा मेहनतका साथ काम गरेको भन्दै उनीहरूको प्रशंसा गरेका थिए । उनले बदलिँदो विश्व परिस्थितिमा दक्षिण कोरियालाई विकासको बाटोमा निरन्तर लैजान सँगै काम गर्ने प्रतिबद्धता व्यक्त गरे ।

संवैधानिक अदालतले अब निलम्बित राष्ट्रपति यून सुक–योलको महाभियोगबारे पनि केही दिनमै निर्णय गर्नेछ । यदि अदालतले महाभियोगलाई सदर गरेमा दक्षिण कोरियाले ६० दिनभित्र नयाँ राष्ट्रपतिको निर्वाचन गर्नुपर्नेछ ।

प्रकाशित : ११ चैत २०८१, सोमबार 11:12