विराट गाेलडकपकाे फाइनल खेलकाे पहिलाे हाफमा थ्रीस्टारकाे अग्रता

द नेप्लिज संवाददाता

२८ फागुन २०८१, बुधबार

विराटनगर– नवौँ संस्करणको रात्रीकालिन विराट गोल्डकप फुटवल प्रतियोगिताको फाइनल खेलकाे पहिलाे हाफमा साविक विजेता थ्रीस्टारले अग्रता लिएकाे छ । विराटनगरस्थित सहिद रंगशालामा भइरहेकाे फाइनल खेलमा थ्रीस्टाले १-० ले अग्रता लिएकाे हाे ।

थ्रीस्टारका खेमराज श्रेष्ठले गाेल गर्दै टिमलाई अग्रता दिलाएकाे हाे । सुरूमा आक्रामक खेलेका सहिद स्मारक ए डिभिजन लिग च्याम्पियन चर्च ब्वाइज युनाइटेडलाई थ्रीस्टार क्लबले टेक्निकली वललाई अगाडि बढाउँदै अग्रता लिन सफल भएकाे हाे ।

चर्च ब्वाइज पहिलो पटक विराट गोल्डकपको उपाधि जित्ने लक्ष्यका साथ मैदानमा छन् भने थ्रीस्टार दोस्रो पटक गोल्डकप जित्ने लक्ष्यका साथ प्रतिस्पर्धामा छन् । चर्च ब्वाइज र थ्रीस्टारबीच यो सिजनमा पहिलो पटक आमुन्नेसामुन्ने भएकाे हाे ।

विराट गोल्डकपको पहिलो पटक फाइनलमा पुगेको चर्च ब्वाइजले एनआरटी र नेपाल पुलिसलाई हराउँदै फाइनल यात्रा तय गरेको हो । चर्च ब्वाईजले एनआरटीलाई २–० र सेमिफाइनलमा पुलिस क्लबलाई १–० गोलले हराएर फाइनलसम्मको यात्रा तय गरेको छ ।

यता, थ्रीस्टार पनि दोस्रो पटक गोल्डकपको उपाधि जितेर इतिहास रच्ने लक्ष्यका साथ मैदान प्रवेश गर्ने दाउमा छ । थ्रीस्टार पाँचौ संस्करणको विराट गोल्डकपको उपाधि जितेको थियो । त्यसबेला आर्मीलाई ३–० गोलले फाइलनमा हराउँदै थ्रीस्टारले उपाधि हात पारेको थियो ।

यो सिजनमा ९ वटा खेलमा ८ वटा गोल्डकपको फाइलनमा पुग्दा तीन वटा चर्च ब्वाइजले उपाधि जितेको छ । फिदिम फागुनन्द, झापा कप, र बागमती गोल्कडपको उपाधि चर्च ब्वाइजले जितिसकेको छ ।

थ्रीस्टारले मछिन्द्र र त्रिभूवन आर्मीलाई पराजित गर्दै विराट गोल्डकपको फाइनलमा पुगेको छ । थ्रीस्टारले मछिन्द्रलाई २–१ गोलले र सेमिफाइनलमा विभागीय टिम त्रिभूवन आर्मी क्लबलाई ३–२ गोलले पराजित गर्दैै फाइनलमा पुगेको छ।

फागुन १९ गतेबाट सुरु भएको गोल्डकपमा दुई विदेशीसहित ‘ए’ डिभिजनका १० टिमको सहभागीता रहेको थियो । प्रतियोगिताको बिजेताले ११ लाख र उपबिजेताले ५ लाख रुपैयाँ पुरस्कार प्राप्त गर्ने छन् । त्यसैगरी उत्कृष्ट प्रशिक्षकलाई १५ हजार, उत्कृष्ट गोलरक्षकलाई १५ हजार, सर्वाधिक गोलकर्तालाई नगद १५ हजार पुरस्कार प्राप्त गर्ने छन् ।

प्रकाशित : २८ फागुन २०८१, बुधबार 19:46