धरान–धनकुटा–भोजपुर सडक खण्डमा बस दुर्घटनामा मृतकको संख्या ३ पुग्यो, १४ घाइते

२३ वैशाख २०८२, मङ्गलबार

विराटनगर – धरानबाट धनकुटा हुँदै भोजपुरतर्फ जाँदै गरेको को १ ख २१७७ नम्बरको यात्रुबाहक बस दुर्घटनामा परेर मृत्यु हुनेको संख्या तीन पुगेको छ।धनकुटा नगरपालिका–६ स्थित औद्योगिक ग्राम नजिक सोमबार भएको दुर्घटनामा गम्भीर घाइते भएका तीन जनाको उपचारका क्रममा ज्यान गएको जिल्ला प्रहरी कार्यालय धनकुटाले जानकारी दिएको छ।

प्रहरीका अनुसार धनकुटा नगरपालिका–६ की ७३ वर्षीया कृष्णकुमारी भुजेलको धनकुटा अस्पतालमा, बस चालक धरान उपमहानगरपालिका–१३ का ५१ वर्षीय रुद्र तामाङको सोमबार बेलुका मृत्यु भएको हो। त्यस्तै भोजपुर षडानन्द नगरपालिका–१३ का ५८ वर्षीय लीलाबहादुर श्रेष्ठको धरानस्थित बीपी कोइराला स्वास्थ्य विज्ञान प्रतिष्ठानमा मंगलबार बिहान ४ बजे निधन भएको हो।बसमा सवार १४ जना घाइते भएका थिए। घाइतेमध्ये दुई जनाको धनकुटा, एक जनाको विराटनगरस्थित नोबेल अस्पताल र बाँकीको धरानस्थित बीपी प्रतिष्ठानमा उपचार भइरहेको प्रहरीले जनाएको छ।

घाइतेहरूमा षडानन्द नगरपालिका–१३ का सूर्यमणि तामाङ र अनमोल तामाङ, सुनसरी बराहक्षेत्र नगरपालिका–२ का कृष्ण राउत, भोजपुर पौवादुङमा गाउँपालिका–३ च्याङग्रेका गङ्गाप्रसाद सापकोटा, भोजपुर नगरपालिका–११ की सविना बराइली र देवी विक, धनकुटा साँगुरीगढी गाउँपालिका–६ का हंशबहादुर राई र दीर्घमाया राई, भोजपुर षडानन्द नगरपालिका–११ की पूर्णमाया तामाङ, इटहरीका आयुष राई र धनकुटा–६ का धनकुमार बिक रहेका छन्। दुर्घटनाको कारण खुल्न बाँकी छ भने घटनाबारे थप अनुसन्धान भइरहेको प्रहरीले जनाएको छ।

प्रकाशित : २३ वैशाख २०८२, मङ्गलबार 12:43