माल्दिभ्स पठाइदिन्छु भन्दै ठग्ने पक्राउ

द नेप्लिज संवाददाता

१२ चैत २०८१, मङ्गलबार

काठमाडौं– वैदेशिक रोजगारीको आकर्षक तलबको प्रलोभनमा पारी माल्दिभ्स पठाइदिन्छु भन्दै रकम ठगेको आरोपमा ५१ वर्षीय हरि बहादुर रूचाललाई प्रहरीले पक्राउ गरेको छ ।

भक्तपुरका रूचालले २ लाख २४ हजार रूपैयाँ लिएर सम्पर्कबिहीन भएको एक पीडितले प्रहरीमा उजुरी दिएका थिए । त्यसैको आधारमा काठमाडौं उपत्यका अपराध अनुसन्धान कार्यालय टेकुबाट खटिएको प्रहरी टोलीले उनलाई सोमबार काठमाडौं महानगरपालिका–१२ बाट पक्राउ गरेको हो ।
प्रहरीका अनुसार अभियुक्तले पीडितलाई वैदेशिक रोजगारीको आकर्षक प्रस्ताव दिँदै रकम लिएपछि सम्पर्कविहीन भएका थिए । पक्राउ परेका हरि बहादुरलाई आवश्यक अनुसन्धान र कारवाहीको लागि वैदेशिक रोजगार विभाग, ताहाचल, काठमाडौं पठाइएको छ ।

प्रकाशित : १२ चैत २०८१, मङ्गलबार 14:25