ट्राभल ब्लगर ज्योति मल्होत्रामाथि पाकिस्तानका लागि जासुसी गरेको आरोप

द नेप्लिज संवाददाता

४ जेठ २०८२, आइतबार

विराटनगर– भारतको हरियाणा र पञ्जाब प्रहरीले यस साता पाकिस्तानलाई गोप्य जानकारी उपलब्ध गराएको आरोपमा पक्राउ गरेकामध्ये हरियाणाकी ट्राभल ब्लगर र युट्युबर ज्योति मल्होत्रा पनि परेकी छन्।

हरियाणा प्रहरीले दिएको जानकारीअनुसार ज्योतिको मोबाइल र ल्यापटपबाट केही शंकास्पद सामग्रीहरू फेला परेका छन्।उनका विरुद्ध सरकारी गोप्य ऐन र भारतीय न्याय संहिताको धारा १५२ (भारतको सार्वभौमिकता, एकता र अखण्डतालाई खतरामा पार्ने कार्य) अन्तर्गत मुद्दा दर्ता गरिएको छ।

पक्राउ परेपछि ज्योतिको पाकिस्तान यात्रा व्यापक रूपमा चर्चामा आएको छ। त्यसभन्दा बाहेक उनको अर्को एउटा भिडिओ पनि समाचारमा आएको छ, जुन गत वर्ष भारतस्थित पाकिस्तान दूतावासको डिनर पार्टीको हो।

सामाजिक सञ्जालमा ज्योति कति लोकप्रिय छन् ?

ज्योति मल्होत्राको युट्युब च्यानल र इन्स्टाग्राम पेजको नाम ‘ट्राभल विथ जो ’ हो।उनको युट्युब च्यानलमा ३.७९ लाखभन्दा बढी सब्सक्राइबर छन् भने इन्स्टाग्राममा १.४० लाख फलोअर्स छन्। फेसबुकमा उनको फलोअर्स संख्या ३.२२ लाख छ।

उनले आफ्नो च्यानलमा देश–विदेशको यात्रा सम्बन्धी भिडिओहरू हाल्ने गर्छिन्। हालसम्म उनले ४ सयभन्दा बढी भिडिओ अपलोड गरिसकेकी छन्।उनले भारतका विभिन्न राज्यहरूसहित विदेशी यात्रा सम्वन्धी पनि थुप्रै भिडिओहरू पोस्ट गरिसकेकी छन्।

भिडिओहरूमा ज्योति कुनै स्थानलाई विभिन्न दृष्टिकोणबाट अन्वेषण गर्छिन् र दर्शकहरूलाई सो स्थानबारे जानकारी दिन्छिन्।उनका भिडिओहरूमा यात्रा खर्चदेखि विशेषताहरू, स्थानीय बजार र वस्तुहरूको मूल्यबारे समेत जानकारी दिइन्छ।

उनले इन्डोनेसिया, पाकिस्तान, संयुक्त अरब इमिरेट्स, थाइल्याण्ड, भुटान, नेपाल र चीनको यात्रा गरिसकेकी छन्, जसका भिडिओहरू च्यानलमा उपलब्ध छन्।उनका च्यानलमा हालै पोस्ट गरिएका भिडिओहरू इन्डोनेसिया यात्रासम्बन्धी छन्।

मार्च र अप्रिलमा ज्योति मल्होत्राले पाकिस्तान यात्रा गरेकी थिइन्। उक्त यात्राका विभिन्न भिडियो र रील्स उनको च्यानलमा अपलोड गरिएका छन्।

पाकिस्तान दूतावासको डिनर पार्टीको भिडिओ पनि चर्चामा

पाकिस्तान दूतावासको डिनर पार्टीको भिडिओ, जुन अहिले चर्चामा छ, उक्त भिडियो ‘ट्राभल विथ जो’ च्यानलमा ३० मार्च २०२४ मा अपलोड गरिएको थियो।भिडिओको सुरुवातमा ज्योतिले आफूले पाकिस्तानको राष्ट्रिय दिवसको उपलक्ष्यमा आयोजित इफ्तार डिनर पार्टीको विशेष निमन्त्रणा पाएको बताउँछिन्।

भिडिओमा उनी एक व्यक्तिसँग भेट गर्छिन्, जसलाई उनी ‘दानिश जी’ भन्छिन्, जसले उनलाई अन्य व्यक्तिहरूसँग युट्युबरको रूपमा परिचय गराउँछन्।भिडिओमा ज्योति पाकिस्तान दूतावासका अधिकारीहरूसँग तथा समारोहमा सहभागी युट्युबरहरू र अन्य पाहुनाहरूसँग भेटघाट गर्छिन् र तिनीहरूबारे आफ्ना फलोअर्सहरूलाई जानकारी दिन्छिन्।ज्योति मल्होत्रालाई पक्राउ गरिए पछि उक्त गत वर्षको भिडिओ फेरि चर्चामा आएको हो।

प्रहरीले के जानकारी दियो?

बीबीसी संवाददाता कमल सैनीका अनुसार हिसारका डीएसपी कमलजीतले भने, ‘हामीले प्राप्त सूचनाको आधारमा हिसार निवासी ज्योति मल्होत्रालाई सरकारी गोप्य ऐन र बीएनएस १५२ अन्तर्गत पक्राउ गरेका हौं।’प्रहरीका अनुसार ज्योति एक पाकिस्तानी नागरिकसँग निरन्तर सम्पर्कमा थिइन् र यसबारे सोधपुछको क्रममा थप जानकारी लिने योजना छ।

हिसारका एसपी शशांककुमारले आइतबार मिडियालाई भने, ‘आधुनिक युद्धहरू अब केवल सिमानामा लडिँदैनन्। एउटा नयाँ प्रवृत्ति देखिएको छ जसअनुसार पाकिस्तानी गुप्तचर एजेन्ट/अपरेटिभ(पीआईओ)हरूले केही सामाजिक सञ्जाल इन्फ्लुएन्सरहरूलाई भर्ती गर्न खोजिरहेका छन् जसबाट उनीहरू आफ्नो दृष्टिकोणलाई सॉफ्ट पावरमार्फत अघि बढाउन चाहन्छन्।’

उनी भन्छन्, ‘त्यही क्रममा हामीले केन्द्रीय एजेन्सीहरूबाट जानकारी पायौं र ज्योति मल्होत्रालाई पक्राउ गर्यौं। उनी पीआईओसँग सम्पर्कमा थिइन्। उनी धेरैपटक पाकिस्तान गइसकेकी छन् र एकपटक चीन पनि गएकी छन्। हामीले उनलाई ५ दिनको प्रहरी हिरासतमा लिएका छौं। हामी केन्द्रीय एजेन्सीहरूसँग समन्वय गर्दै उनको वित्तीय विवरण र यात्राहरूको विश्लेषण गर्दैछौं।’

पीटीआई समाचार एजेन्सीका अनुसार हिसारका एसपीले भनेका छन्, ‘ज्योति मल्होत्रा पीआइओसँग सम्पर्कमा थिइन्।’द हिन्दू को रिपोर्टअनुसार ७ मईमा पञ्जाब प्रहरीले दिएको जानकारीपछि ज्योतिलाई सोधपुछका लागि बोलाइएको थियो।

उनलाई शुक्रबार पक्राउ गरिएको थियो। शनिबार उनलाई अदालतमा प्रस्तुत गरियो, जहाँबाट ५ दिनको अनुसन्धान म्याद पछि प्रहरी थुनामा पठाइएको हो।

इण्डियन एक्सप्रेस को रिपोर्टअनुसार अधिकारीहरूले भनेका छन् कि ज्योति पाकिस्तानको पक्षमा जासुसी गर्दै थिइन् र आफ्नो सामग्रीमार्फत पाकिस्तानको सकारात्मक छवि प्रस्तुत गर्न त्यहाँका ‘ह्याण्डलर’हरूसँग प्रत्यक्ष सम्पर्कमा थिइन्।

रिपोर्टअनुसार उनी गुरुग्रामको एक कम्पनीमा काम गर्थिन्। कोभिड–१९ महामारीका बेला उनले जागिर छाडिन् र झण्डै तीन वर्षअघि ट्राभल ब्लगर बन्ने निर्णय गरिन्।

रिपोर्टअनुसार प्रहरी अनुसन्धानको सुरुवाती चरणमा ज्योति भनेकी छन्,‘उनी सन् २०२३ मा भिजिटर भिसाका लागि पाकिस्तान दूतावास गएकी थिइन्।’द हिन्दू ले प्रहरीको प्रारम्भिक प्रतिवेदन उद्धृत गर्दै लेखेअनुसार झण्डै दुई वर्षअघि उनी पाकिस्तान दूतावासका अधिकारी एहसान–उर–रहीम उर्फ दानिशसँग सम्पर्कमा आएकी थिइन्। त्यतिबेला उनी भिसाका लागि गएकी थिइन्।

उनले दानिशसँग सम्पर्क राखिरहिन् र दुई पटक पाकिस्तान यात्रा गरिन्। त्यहाँ उनले दानिशका चिनेजानेका अली अहवानसँग भेट गरिन्, जसले पाकिस्तानमा उनको बसोबासको व्यवस्था गरेको आरोप लागेको छ।

इण्डियन एक्सप्रेस अनुसार ज्योति मल्होत्राले दानिशको नम्बर प्रहरीलाई दिएकी छन् र आफू उनीसँग सम्पर्कमा रहेको बताएकी छन्।द इकोनोमिक टाइम्स का अनुसार यही महिनाको १३ मईमा भारत सरकारले पाकिस्तान दूतावासका एक व्यक्ति, एहसान–उर–रहीम उर्फ दानिशलाई ‘पर्सोना नन ग्राटा (अवाञ्छित व्यक्ति)’ घोषणा गर्दै २४ घण्टाभित्र देश छाड्न आदेश दिएको थियो।

ज्योति मल्होत्राका बुबाले के भने?

द हिन्दू को रिपोर्टअनुसार ज्योति मल्होत्राका बुबाले छोरीमाथिको आरोप अस्वीकार गर्दै भनेका छन्, ‘छोरीलाई फसाइएको हो।’ज्योतिको बुबा हरीशकुमारले बीबीसीलाई भने अनुसार प्रहरी अधिकृतहरू बिहीबार बिहान साढे नौ बजे घरमा आएर ज्योतिलाई लिएर गए।

उनले भने, ‘पाँच–छ जनाको टोली आयो। उनीहरूले झण्डै आधा घण्टा घर खानतलासी गरे र त्यसपछि ल्यापटप र तीन वटा मोबाइल फोन जफत गरे।’उनी भन्छन्, ‘मेरो छोरी सरकारले अनुमति दिएरै पाकिस्तान गएकी थिइन् । त्यो पनि जाँचपछिको प्रक्रिया थियो र त्यसपछि मात्रै भिसा दिइएको थियो।’

#ज्योति# मल्होत्रा

प्रकाशित : ४ जेठ २०८२, आइतबार 23:45