एमाले मोरङको मतगणना सुरु, सय मत गणना हुँदा अध्यक्षमा अजम्बरको अग्रता

गौरी बस्नेत खड्का

२२ फागुन २०८१, बिहीबार

विराटनगर– नेकपा एमाले मोरङको बुधबार राती सम्पन्न निर्वाचनको मतगणना विराटनगरको पाञ्चालीस्थित एमाले पार्टी कार्यालयमा सुरु भएको छ । एक सय मत गणना हुँदा अध्यक्षमा अम्बर राईले ६ मतको अग्रता लिएको छ ।

इत्तर पक्षका अध्यक्ष उम्मेदवार अजम्बर राईले ५१ मत ल्याउँदा संस्थापन पक्षका उम्मेदवार राजकुमार राईले ४५, इत्तर पक्षका उपाध्यक्षमा सागर थापाले ५० र संस्थापन पक्षकी शान्ति लिम्बूले ४२, सचिवमा इत्तर पक्षका सोमराज थापाले ४८ र संस्थापनका रबिन थापाले ४५, उपसचिवमा पुरुषतर्फ इत्तर पक्षका सन्तोष वान्तवाले ५२ र संस्थापनका इर्जालाल राजबंशीले ४१ र उपसचिव महिलातर्फ इत्तर पक्षकी उषा झाले ४५ मत ल्याउँदा संस्थापन पक्षकी शील्पा निराला कार्कीले ४९ मत ल्याएका छन् । मत गणना जारी रहेको र अब ७८८ मत गणना गर्न बाँकी रहेको छ । बुधबार अबेर रातीसम्म भएको मतदानमा कूल मतदाता ९११ जनामध्ये ८८८ जनाले मतदान गरेको छन् ।

अध्यक्ष, उपाध्यक्ष, सचिव, उपसचिव दुई र सदस्य गरी १६५ सदस्यीय कार्य समितिको नयाँ नेतृत्व चयनका लागि भएको निर्वाचनमा ७१ जना सदस्य निर्विरोध निर्वाचित भइसकेका छन् । निर्वाचनमा संस्थापन र संस्थापन इत्तर प्यानल बनाएर नेताहरु चुनावी प्रतिस्पर्धामा उत्रेका हुन् ।

संस्थापन पक्षबाट अध्यक्षमा पूर्वप्रदेश सांसद राजकुमार ओझा, उपाध्यक्षमा शान्ति लिम्बू, सचिवमा रविन थापा, उपसचिवमा इर्जालाल राजबंशी र विराटनगर महानगर उपप्रमुख शील्पा कार्कीलगायत छन् भने इत्तर पक्षबाट अध्यक्षमा जिल्ला समन्वय समिति मोरङ प्रमुख अजबर राई, उपाध्यक्षमा सागर थापा, सचिवमा सोमराज थापा, उपसचिवमा सन्तोष वान्तावा र जिल्ला समन्वय समितिकी उपप्रमुख उषा झा ठाकुरलगायत चुनावी प्रतिस्पर्धामा छन् ।

प्रकाशित : २२ फागुन २०८१, बिहीबार 17:08