ट्रम्पसँगको ब्यापार युद्धबाट जोगिन मोदीले भन्सार महसुल घटाउँदै

द नेप्लिज संवाददाता

२८ माघ २०८१, सोमबार

विराटनगर– भारतका प्रधानमन्त्री नरेन्द्र मोदीले अमेरिकी सामानमा लगाउने भन्सार महसुल घटाउने गृहकार्य थालेका छन् । उनको यो तयारीलाई अमेरिकी राष्ट्रपति डोनाल्ड ट्रम्पलाई मख्ख पार्ने नीतिको रुपमा बुझिएको छ । उनी अमेरिकासँग ‘ब्यापार युद्ध’ ले हुने नोक्सानी चाँहदैनन् ।

ट्रम्पसँगको निर्धारित भेटघाट अगाडि अमेरिकी सामानहरूमा महसुल कटौती गर्ने दिशामा मोदी अघि बढेको अन्तर्राष्ट्रिय सञ्चारमाध्यमहरुले खुलस्त पारेको छ । उनी ट्रम्पको निम्तोमा बुधबार र बिहीबार अमेरिकाको राजकीय भ्रमणमा जाँदै छन् । ट्रम्पले मंगलबार र बुधबार संसारका सबै मुलकमाथि ’रेसिप्रोकल’ महसुल अर्थात अमेरिकी समानमा कुनै राष्ट्रले जति महसुल लगाउँछन्, ती मुुलुकका सामान अमेरिकामा आयात हुँदा त्यति नै भन्सार दर लगाउने घोषणा गरेका छन् ।

भारतीय बजारमा अमेरिकाको इलेक्ट्रोनिक, चिकित्सा र शल्यक्रिया उपकरणहरूका साथै केही रसायनहरूलाई सहज बनाउन मोदीले महसुल घटाउने मनसाय बनाएका छन् । भारत अमेरिकासँग सानो व्यापार सम्झौताका लागि पनि खुला रहेको मोदीको गतिविधिबाट झल्किन्छ । भारतको सबैभन्दा ठूलो साझेदार अमेरिकालाई नउक्साउन मोदी ट्रम्पसँग सहमतिमा पुगेर सम्भावित व्यापार युद्धबाट जोगिन चाहेका छन् । मोदीको यो कदमले भारतीय अर्थतन्त्रमा असर पर्ने अर्थविदहरुको भनाइ छ ।

सन् २०२३/२४ मा दुई मुलुकबीच ११८ अर्ब डलरको व्यापार हुँदा भारतलाई ३२ अर्ब डलरको नाफा भएको थियो । अमेरिकी राष्ट्रपति डोनाल्ड ट्रम्पले संसारभरिका मुलुकहरूबाट आउने सामानमा लगाउन चाहेको ’रेसिप्रोकल’ भन्सार महसुलले अमेरिकालाई विश्वका अन्य मुलुकसँग व्यापार युद्धमा धकेल्ने खतरा छ ।

ट्रम्पले आइतबार सञ्चारकर्मीहरुसँग अमेरिकामा आउने स्टिल र आलमुनियमको आयातमा सोमबारदेखि थप २५ प्रतिशत महसुल लगाउने प्रष्टयाएका छन् । अमेरिकामा स्टिल निर्यात गर्नेहरुमा क्यानडा, ब्राजिल, मेक्सिको, दक्षिण कोरिया र भियतनाम मुख्य हुन् । अमेरिकामा प्राथमिक आलमुनियम धातुको सबैभन्दा ठूलो आपूर्तिकर्ता क्यानडा हो । उसले २०२४ को पहिलो ११ महिनामा अमेरिकाको कुल आयातको ७९ प्रतिशत ओगटेको थियो ।

अमेरिकामा औसत भन्सार दर एकदमै कम छ । संसारका लगभग सबै मुलुकमा औसत भन्सार दर अमेरिकाको भन्दा धेरै छ । ‘यदि उनीहरूले हाम्रा सामानमा महसुल लगाउँछन् भने हामी पनि उनीहरूका सामानमा त्यति नै महसुल लगाउँछौं, यो सामान्य कुरा हो,’उनले भन्दै आएका छन् ।

विश्व व्यापार संगठनका अनुसार, अमेरिकाको औसत महसुल लगभग २ दशमल २ प्रतिशत छ । भारतको १२ प्रतिशत, ब्राजिलको ६.७ प्रतिशत, भियतनामको ५.१ प्रतिशत र युरोपेली संघका मुलुकहरूको २.७ प्रतिशत छ । युरोपेली संघले अमेरिकी कार आयातमा १० प्रतिशत महसुल लगाइरहेको । तर अमेरिकाले युरोपेली कारहरूमा २.५० प्रतिशत मात्र महसुल लगाउँदै आएको छ।

प्रकाशित : २८ माघ २०८१, सोमबार 14:56