किम जोङको टोली विराटनगरमा

द नेप्लिज संवाददाता

२३ वैशाख २०८२, मङ्गलबार

विराटनगर– दक्षिण कोरियाका किम जोङथेक नेतृत्वको टोली विराटनगर आइपुगेका छन् । मुलुकको कान्छो महानगर विराटनगरको शैक्षिक र स्वास्थ्य क्षेत्रको अवस्थामा सहयोग गर्ने उद्देश्यले उनीहरु मंगलबार यहाँ आइपुगेका हुन् ।

विराटनगर महानगर प्रमुख नागेश कोइरालाले किमको टोलीलाई महानगरमा स्वागत गरेका छन् । नेपालको शिक्षा र स्वास्थ्य क्षेत्रमा सहयोग गर्दै आएको दक्षिण कोरियाको द होप सेन्टरका किम नेतृत्वको टोलीले विराटनगर महानगरपालिकाका प्रमुख कोइरालासित भेटघाट गर्दै महानगरको शिक्षा र स्वास्थ्य क्षेत्रको अवस्था बारे जिज्ञासा राखेका थिए ।

किम नेतृत्वको टोलीले आगामी दिनमा महानगर क्षेत्रभित्र सञ्चालित सामुदायिक विद्यालयको भौतिक पूर्वाधारसँगै गरीव तथा जेहेन्दार विद्यार्थीलाई शैक्षिक र खेलकुद सामग्रीसँगै आर्थिक सहयोग गर्ने प्रतिबद्धता जनाएको छ । विगत दुई दशकदेखि कोरियामा व्यवसायसँगै समाजसेवामा सक्रिय नवराज शिवाकोटीको समन्वयमा आएको द होप सेन्टरको टोली र महानगरबीच आगामी दिनमा शिक्षा र स्वास्थ्य क्षेत्रको सुधारका लागि सहकार्य गर्ने सहमति भएको छ ।

दक्षिण कोरिया र नेपालबीचको पुरानो सम्बन्धको बारेमा बोल्दै प्रमुख कोइरालाले दक्षिण कोरियाले कृषि, प्रविधि, शिक्षा र स्वास्थ्य क्षेत्रमा गरेको प्रगति अनुकरणीय रहेको बताएका हुन् ।

प्रकाशित : २३ वैशाख २०८२, मङ्गलबार 17:01