पहाडी–हिमाली क्षेत्रमा वर्षा र हिमपातको सम्भावना

द नेप्लिज संवाददाता

३० चैत २०८१, शनिबार

काठमाडौँ — हाल देशमा पश्चिमी वायु, स्थानीय वायु र अरब सागरबाट भित्रिएको जलवाष्पयुक्त हावाको संयुक्त प्रभावका कारण विभिन्न प्रदेशहरूमा मौसममा परिवर्तन देखिएको छ । विशेषगरी पहाडी र हिमाली क्षेत्रमा मेघगर्जन, चट्याङसहित हल्कादेखि मध्यम वर्षा र उच्च भूभागमा हिमपातको सम्भावना रहेको मौसम पूर्वानुमान महाशाखाले जनाएको छ।

कोशी, बागमती र गण्डकी प्रदेशका थोरै स्थानहरूमा हल्कादेखि मध्यम वर्षा भइरहेको छ । सुदूरपश्चिम, कर्णाली र लुम्बिनी प्रदेशका पहाडी भूभागमा मेघगर्जन, चट्याङसहित हल्कादेखि मध्यम वर्षाको सम्भावना छ ।

उच्च पहाडी तथा हिमाली भेकका थोरै स्थानहरूमा हल्का वर्षा र हिमपातको सम्भावना रहेको छ । मौसम पूर्वानुमान महाशाखाले मेघगर्जन, चट्याङ, वर्षा र हिमपातका कारण स्वास्थ्य, दैनिक जनजीवन, कृषि, सडक तथा हवाई यातायातमा असर पर्न सक्ने भन्दै सतर्कता अपनाउन आग्रह गरेको छ । विराटनगरमा आज आंशिक बदली रहनेछ । हाल मौसम सफा रहेको छ ।

देशभरि मौसममा देखिएको परिवर्तनले जनजीवनमा असर पार्न सक्ने भएकाले आवश्यक सतर्कता अपनाउन महाशाखाले अनुरोध गरेको छ । विशेषगरी पहाडी र हिमाली क्षेत्रवासीहरूले मौसमको अपडेटमा ध्यान दिनु आवश्यक छ ।

प्रकाशित : ३० चैत २०८१, शनिबार 06:43