ग्रामथानका अध्यक्षले जनप्रतिनिधि चढ्ने सरकारी गाडीको चाबी खोस्दै...

द नेप्लिज संवाददाता

२० फागुन २०८१, मङ्गलबार

विराटनगर– कार्यपालिका बैठकको दुई प्रस्तावमा असहमति जनाए पछि मोरङको ग्रामथान गाउँपालिकाका अध्यक्ष नमोनारायण माझीले उपाध्यक्ष र वडाध्यक्ष चढ्ने सरकारी सवारीसाधनको चाबी खोसेका छन् । गत उपनिर्वाचनमा नेकपा (माओवादी केन्द्र) बाट उम्मेदवार बनेर माझी अध्यक्ष पदमा निर्वाचित भएका हुन् ।

उक्त बैठकमा मंगलबार ६ प्रस्ताव राखिएको थियो । तीमध्ये दुई प्रस्तावमा असहमति जनाउँदा अध्यक्षले गाडीको चाबी खोसेको उपाध्यक्ष गुणावतीदेवी चौधरीको आरोप छ । कांग्रेस र एमाले पक्षका जनप्रतिनिधिले बहुपोषण कार्यक्रम र लोहन्द्रा खोला ठेक्काको विषयमा असहमति जनाएका थिए । अध्यक्षले माओवादी कार्यकर्ता खटाएर चाबी खोसेको उपाध्यक्ष चौधरीको आरोप छ ।

माझीले अध्यक्षको पदभार सम्हालेदेखि नेपाली कांग्रेस र नेकपा (एमाले)बाट निर्वाचित जनप्रतिनिधिले कार्यपालिका बैठक बहिष्कार गर्दै आएका छन् । माघ २९ गतेको कार्यपालिका बैठकका निर्णय पनि कार्यान्वयन गर्न उच्च अदालत विराटनगरले रोक लगाएको छ ।

नियम अनुसार कार्यपालिका सदस्यलाई तीन दिनअगाडि बैठकको सूचना नगरी अल्पमतका आधारमा निर्णय गरेको भन्दै उपाध्यक्ष चौधरीले अदालतमा रिट दायर गरेकी थिइन् । ग्रामथान–२ का वडाध्यक्ष यादव खतिवडाले पनि मोटरसाइकलको चाबी खोसिएको आरोप लगाएका छन् । ग्रामथान कार्यपालिकामा कांग्रेस–एमालेबाट निर्वाचत जनप्रतिनिधिको बहुमत छ ।

उनीहरूले बक्राहासहितका खोलाबाट हुनै अवैध उत्खननमा अध्यक्षको मिलेमतो रहेको भन्दै विरोध गर्दै आएका छन् । अध्यक्ष माझीले स्थानीय स्रोत साधनको प्रयोग गरेर पालिकाले आम्दानी गर्ने बाटो नै रोकेको हुनाले जनप्रतिनिधि चढ्ने सरकारी गाडीको चाबी खोसेको बताए । जनहितको बहुपोषण कार्यक्रम र आम्दानीको मुख्य स्रोत खोलाको बालुवा ठेक्का अवरुद्ध गरेर पालिकालाई निस्क्रिय बनाइएको उनको आरोप छ ।

‘बक्राहासहितका खोलाबाट हुने एक करोडभन्दा बढीको आम्दानी पालिकाको मुख्य स्रोत हो, आम्दानी नै नभए पछि गाडीमा इन्धन हाल्ने खर्च कहाँबाट आउँछ ? काम नगर्ने, अनि गाडीमा बसेर हात हल्लाएर हुन्छ,’अध्यक्ष माझीले भने । उनको अनुसार सशर्त अनुदानमा सञ्चालन हुने दुई करोडभन्दा माथिको बहुपोषण कार्यक्रममा पनि कांग्रेस–एमालेका जनप्रतिनिधिहरुले सहमति दिएनन्, कुनै कामै नगर्ने भन्ने गाडी केको लागि चाहियो ? गाडीमा हाल्ने इन्धन खर्च कसले दिने ?’ अध्यक्ष माझीले पार्टीगत गुटबन्दी वा गठबन्धन बनाएर गरिने यस्ता विरोधले जनतालाई बेफाइदा पुर्याउने बताए । ‘जुन दलबाट जितेर आए पनि जनप्रतिनिधि हो, पार्टीका लागि होइन जनताका लागि काम गर्ने हो ,’उनले भने,‘कामै नगर्नेलाई सरकारी गाडी किन चाहियो ?’

प्रकाशित : २० फागुन २०८१, मङ्गलबार 20:12