अध्यादेशबाट देश चलाउनु निरंकुशताको प्रस्थान बिन्दु : शेखर कोइराला

२८ माघ २०८१, सोमबार

काठमाडौं– नेपाली कांग्रेसका नेता डा. शेखर कोइरालाले अध्यादेशबाट देश चलाउनु निरंकुशताको प्रस्थान बिन्दु भएको बताएका छन् । जिपि कोइराला फाउण्डेशनले सोमबार भक्तपुरमा आयोजना गरेको गिरिजाप्रसाद कोइराला र वर्तमान राजनीति विषयक विचार गोष्ठीमा कोइरालाले दुई तीहाईको सरकारले संसदलाई छलेर अध्यादेश ल्याउन जरुरत नरहेको अवस्थामा अध्यादेशबाट देश चलाउनु निरंकुशताको प्रस्थान बिन्दु भएको बताएका हुन् ।

‘मुलुकको आवश्यकताका आधारमा वर्तमान सरकार गठन भएको भन्दै सरकारलाई सहि दिशा दिनका लागि सरकारले गरेका गलत कामलाई गलत भन्न नसकिए कांग्रेसको औचित्य रहँदैन,’ उनले भने, ‘सामाजिक सञ्जाल विधेयक अभिव्यक्ति स्वतन्त्रतामा प्रतिबन्ध लाउने गरी आएकोले नियन्त्रणकारी व्यवस्था हटाएर मात्रै संसदबाट पारित हुनुपर्छ ।’

कांग्रेस–एमालेले दुई तिहाइको बलमा संविधान संशोधन गर्न नहुने भन्दै कोइरालाले संविधान संशोधनका लागि माओवादी लगायतका दलहरुसँगको सहमतिका आधारमा सबैलाई अपनत्व हुने गरी अघि बढ्नुपर्ने बताए।

उनले राजनीतिमा सहकार्य गरेर अघि बढ्ने गिरिजाप्रसाद कोइरालाको नीतिलाई स्मरण गर्दै कांग्रेसलाई अघि बढाउन व्यक्तिगत स्वार्थ त्याग्नुपर्ने बताए।

प्रकाशित : २८ माघ २०८१, सोमबार 18:10