‘देशमा शान्ति चाहिन्छ, डराउनुपर्दैन’

द नेप्लिज संवाददाता

९ चैत २०८१, शनिबार

विराटनगर– पूर्वराजा ज्ञानेन्द्र शाहले गोरखाको गोरखकाली मन्दिरमा विशेष पूजापछि सञ्चारकर्मीसँग कुरा गर्दै देशमा शान्ति आवश्यक रहेको र कसैले पनि डराउनु नपर्ने बताएका छन् ।

उनले सबैले एकअर्काको कुभलो नचिताउन र देशमा शान्ति, विकास, सुख, समृद्धि कायम रहोस् भन्ने आफ्नो कामना रहेको उल्लेख गरे । गोरखा आफ्ना पुर्खाको थलो भएको र त्यहाँ आउँदा आफूलाई खुशी लागेको पनि उनले बताए ।

पूर्वराजा शाह गोरखनाथ, गोरखकाली तथा मनकामना मन्दिरमा पूजा अर्चना गर्न गोरखा आएका हुन् । यसअघि उनले पोखरामा झण्डै एक महिना लामो बसाइपछि फागुन २५ मा काठमाडौं फर्किएका थिए । उनको गोरखा भ्रमणको क्रममा राजावादीहरूले स्वागत र नागरिक सम्मानको तयारी गरेका छन् । पूर्वराजा शाहको निरन्तरको सक्रियताले राजतन्त्र पुनस्र्थापनाको चर्चा पुनः सतहमा आएको छ ।

यता काठमाडौंको दरबारमार्गस्थित नारायणहिटी दरबार अगाडि शनिबार दिउँसो राजतन्त्र समर्थक समूहले प्रदर्शन गरेका छन् । उनीहरूले राजतन्त्र पुनःस्थापनाको माग गर्दै प्रदर्शन गरेका हुन्। प्रदर्शनलाई मध्यनजर गर्दै सुरक्षा व्यवस्था कडा पारिएको थियो । प्रदर्शनकारीहरूले 'पूर्वराजा ज्ञानेन्द्र शाहलाई पुनः एकपटक राजा घोषणा गरौं' भन्ने नारा लेखिएको ब्यानर बोकेका थिए ।

प्रकाशित : ९ चैत २०८१, शनिबार 15:40