राजदूत शर्मा र मुख्यमन्त्री आदित्यनाथबीच महत्वपूर्ण भेटवार्ता

द नेप्लिज संवाददाता

१९ चैत २०८१, मङ्गलबार

विराटनगर– नेपाल र भारतबीचको सम्बन्धलाई थप मजबुत बनाउने उद्देश्यले भारतका लागि नेपाली राजदूत डा. शंकरप्रसाद शर्मा र उत्तर प्रदेशका मुख्यमन्त्री योगी आदित्यनाथबीच लखनऊमा महत्वपूर्ण भेटवार्ता सम्पन्न भएको छ ।

यस भेटवार्तामा द्विपक्षीय व्यापार विस्तार, आर्थिक सहकार्य, धार्मिक तथा सांस्कृतिक पर्यटन प्रवद्र्धन, उच्च शिक्षा र छात्रवृत्तिको अवसरहरू, जलविद्युत् तथा ऊर्जा परियोजनामा सहकार्य, यातायात तथा कनेक्टिविटी सुधार, सीमा सुरक्षा, आपसी सहकार्य, र विकासका सम्भावनाहरू जस्ता विविध विषयमा गहन छलफल भएको छ ।

राजदूत शर्माले नेपाल–भारत ऐतिहासिक मित्रतालाई अझ प्रगाढ बनाउन पहल गर्ने प्रतिबद्धता व्यक्त गर्दै द्विपक्षीय सहकार्य विस्तारमार्फत आपसी विकास र समृद्धिमा जोड दिए । मुख्यमन्त्री आदित्यनाथले पनि नेपालसँगको सम्बन्धलाई उच्च प्राथमिकता दिँदै विभिन्न क्षेत्रमा सहकार्य गर्न तत्परता जनाए ।

यस भेटवार्ताले नेपाल–भारत सम्बन्धलाई नयाँ उचाइमा पुर्याउने विश्वास गरिएको छ । विशेष गरी धार्मिक तथा सांस्कृतिक पर्यटन प्रवद्र्धनमा रामायण सर्किटजस्ता परियोजनाहरू मार्फत दुवै देशका नागरिकहरूबीचको सम्बन्धलाई अझ मजबुत बनाउने अपेक्षा गरिएको छ ।

प्रकाशित : १९ चैत २०८१, मङ्गलबार 09:12