बालिका बलात्कार प्रकरण

अध्यक्षको संलग्नता ढाकछोप गर्न राज्य संयन्त्र सक्रिय

द नेप्लिज संवाददाता

२७ चैत २०८१, बुधबार

रुपन्देही– कपिलवस्तुको शुद्धोधन गाउँपालिका अध्यक्ष कमलेश शरण चौधरीसहित तीन जनामाथि सामूहिक बलात्कार, अपहरण र शरीर बन्धकको गम्भीर आरोप लागेको घटनालाई राज्यपक्षले कमजोर बनाएको पीडित पक्षको गुनासो छ ।

प्राप्त जानकारी अनुसार यो घटना भैरहवा–१५ बस्ने कपिलवस्तुकी एक बालिकासँग सम्बन्धित छ । उनी अध्ययनका लागि बुटवलमा बस्दै आइरहेकी थिइन् । उनीसँग गत असोज ५ र ६ मा देवीनगरस्थित एक कोठामा बन्धक बनाएर पटक–पटक बलात्कार भयो । जाहेरीअनुसार, शुद्धोधन–२ का सन्तकुमार यादव, राजेश्वर चौधरी र गाउँपालिका अध्यक्ष स्वयं घटनामा संलग्न थिए ।

पीडितले गत पुस २० मा इलाका प्रहरी कार्यालय बुटवलमा किटानी जाहेरी दिँदा पनि तत्काल दर्ता नभएको, अध्यक्षका दाजु मधुसूदन शरण चौधरीको दबाबमा प्रक्रिया रोकिएको आरोप पीडितका बुबाले लगाएका छन् । राष्ट्रिय मानवअधिकार आयोगमा उजुरी दिएपछि मात्र पुस २६ मा जाहेरी दर्ता भएको थियो ।

तर प्रहरी र सरकारी वकिल कार्यालयले पीडितको कथन विपरीत मुद्दा मोडेका छन् । आरोपी सन्तकुमार यादवलाई मात्र पक्राउ गरी एकल प्रतिवादी बनाएर प्रस्तुत मुद्दा पीडितको न्याय प्राप्तिको अधिकारमाथिको कुठाराघात भएको आरोप छ । ‘तीन जनाको विरुद्धमा प्रष्ट रूपमा किटानी जाहेरी दिएँ, तर दुई जना किन उम्किए ?’ पीडितले प्रश्न गरिन् ।

फागुन २५ मा पूरक जाहेरीका लागि प्रहरीबाट पत्र आएपछि बयान दिने क्रममा ‘मुद्दा फाँटका’ प्रहरीले दुव्र्यवहार गरेको पीडितको भनाइ छ । पीडितका अनुसार त्यसपछि केही सत्तारुढ दलका नेताहरू तथा पालिका अध्यक्ष आफैंले मुद्दा चल्न नदिने प्रयत्न थालेका छन् । उनीहरूबाट धम्की, त्रास र दबाबसमेत आएको आरोप पीडित परिवारको छ ।

घटनाको विवरण अनुसार असोज ५ मा पीडित सामान किन्न डेरा बाहिर निस्किँदा गाउँकै चिनेजानेको सन्तकुमारले सिध्दबाबा घुम्न जाने भन्दै झुक्याएर नशालु पदार्थ खुवाएर आफू बस्ने कोठामा लगे । उनलाई बाँधेर र मुख थुनेर बलात्कार गरेपछि गाउँपालिका अध्यक्ष कमलेशलाई बोलाएर पीडितलाई लठ्याउने इन्जेक्सन दिएको आरोप छ ।

असोज ५ को राति यादवले चार पटक बलात्कार गरेको, भोलिपल्ट तीन पटक र राजेश्वर चौधरीले एक पटक बलात्कार गरेको आरोप जाहेरीमा उल्लेख छ । गाउँपालिका अध्यक्ष चौधरीले पीडितको घरमा पुगेर छोरी यादव केटासँग भागेर कोठामा रहेकाले लिन जाने भन्दै परिवारलाई बुटवल पुर्याएका थिए । त्यस पछि अचेत अवस्थाकी छोरी परिवारको जिम्मा लगाएर पीडकहरु भागेका थिए ।

मुलुकी अपराध संहिता दफा २१२, २१३, ३६, र २२७ (क) अनुसार सामूहिक बलात्कार, अपहरण, शरीर बन्धक, ढाकछोप र आरोपी भगाएको अभियोगमा अनुसन्धान हुनुपर्ने अधिवक्ताहरूको भनाइ छ । ‘पीडितले आफै बयान दिएको र सनाखत गरेकी हुनाले मुद्दा नचल्ने आधार छैन,’ उनीहरू भन्छन् ।

इलाका प्रहरी कार्यालय बुटवलकाका अनुसार पूरक जाहेरीको सनाखत भइसकेको, घटनाको वारदात र अवस्था अनुसार सरकारी वकिलको कार्यालयको सिफारिस अनुसार मात्र थप प्रक्रिया अगाडि बढाइनेछ । अध्यक्ष चौधरीले भने ‘म पीडितको उद्धार गर्न गएको थिएँ, आरोप निराधार छन् ।’ उनी सञ्चारकर्मीहरुसँग आफू निर्दोष रहेको दाबी गरेका छन् ।

प्रकाशित : २७ चैत २०८१, बुधबार 08:02