गोलबजार आठौँ मेयर गोल्डकप आयोजना हुँदै

गणेश साह

११ चैत २०८१, सोमबार

सिरहा– गोलबजार नगरपालिकाले आठौँ गोल्डकप फुटवल प्रतियोगिताको आयोजना गर्न लागेको छ । ‘राष्ट्रको लागि खेलकुद, स्वास्थ्यको लागि खेलकुद’ मूल नाराका साथ नगरपालिकाले आउँदो चैत्र १५ गतेदेखि गोलबजारको गुरुधामस्थित एकिकृत खेलग्राममा गोल्डकप प्रतियोगिता आयोजना गर्न लागेको हो ।

नगरपालिकाका प्रवक्ता सञ्जित लामाले पत्रकार सम्मेलन आयोजना गरी राष्ट्रिय तथा अन्तर्राष्ट्रिय गरी ८ वटा टिम सहभागी हुने गोल्डकप प्रतियोगिताको सम्पूर्ण तयारी पूरा भएको जानकारी दिएका हुन् । उनले गोल्डकपको टाइसिटसमेत पत्रकार सम्मेलनमा सार्वजनिक गरेका छन् ।

प्रतियोगितामा चात्या सा फुटवल क्लव दमक झापा, मनोहरा एकीकृत युवा क्लव काठमाडौं, गोलबजार स्पोर्टस् क्लव, रोमन फुटबल क्लव सर्लाही, पेमा युवा क्लब विराटनगर, साम्ची फुटबल क्लब भुटान र सल्हेश युवा क्लब सिरहाको सहभागीता रहने नगरपालिकाका प्रवक्ता सञ्जित लामाले बताएका छन् ।

प्रतियोगिताको उद्घाटन खेल रोमन फुटबल क्लब सर्लाही र पेमा युवा क्लब विराटनगरबीच हुने उनले बताए । गोल्डकप विजेताले ४ लाख १ हजार र शिल्ड, उपविजेताले २ लाख १ हजार नगदसहित कप प्राप्त गर्ने छन्।

नगरपालिकाले खेलकुद क्षेत्रको विकास र प्रवर्द्धनका साथै स्थानीय तथा राष्ट्रिय एवं अन्र्राष्ट्रिय स्तरका खेलाडीहरूबीचको प्रतिस्पर्धाले व्यवसायिक खेलको विकास गर्न गोल्डकपलाई निरन्तरता दिइएको नगरपालिका प्रमुख श्यामकुमार श्रेष्ठले बताए ।

प्रकाशित : ११ चैत २०८१, सोमबार 23:08