हातेमालो गर्दै अघि बढौँ

मुलुकको पत्रकारिताको वर्तमान अवस्थालाई नियालिरहनु भएका विश्वभरिकै सचेत नेपालीलाई डिजिटल पत्रिका ‘द नेप्लिज डट कम,’को शुभारम्भ अंकमा मनैदेखि स्वागत छ । राजनीतिक आवरणमा विभाजित दलीय पत्रकारिताको आरोपले यो चौथो अंगको जग नै हल्लिएको बेला शुन्यबाट नयाँ प्रयासको थालनी गरेका छौं ।

जनभावनाको कदर गर्दै शुभारम्भ कुनै दलका नेता वा मन्त्रीबाट गराएनौं । अबोध बालकलाई प्रमुख अतिथिको रुपमा आमन्त्रण गर्यौं । उनले ल्यापटपको किबोर्ड थिचेर अनलाइनको उद्घाटन गरे । बालकले जसरी कसैसँग विभेद गर्दैन र सत्य नै बोल्छ त्यही नीति यो अनलाइनले अंगिकार गरेको छ । यो अनलाइन अब हजुरहरुको आँैलामा छ । भुइँमान्छेको चाहना अनुरुप अगाडि बढ्ने अठोट लिएका छौं । त्यसैले रत्तिभर पनि हत्तारोमा छैनौं । 

सामाजिक सद्भाव एवं एकता कायम राख्दै खबरको स्वरुपमा नागरिकलाई पूर्ण सूचना दिनु र आम मान्छेका समस्याहरु बारे अधिकार क्षेत्र अनुसार तीन तहकै सरकारलाई अवगत गराउँदै समाधानको प्रष्ट मार्ग खोज्नु हाम्रो उद्देश्य हो ।

मिथ्या समाचारको बाढीले अहिले मुख्य शीर्षक पढ्दै तथ्य हो कि कल्पना भन्ने शंका हुने अवस्था छ । केवल भाइरल हुन र सस्तो लोकप्रियताका लागि ताइँ न तुइँको खबर पोस्टयाउनु हाम्रो लक्ष्य होइन । सामाजिक स्तरमा एकताबद्ध भएर भ्रम र हल्लालाई चिर्दै सन्तुलित पत्रकारिता हाम्रो एक मात्र मिसन हो । 

अहिले सर्वत्र सूचनाको बाढी छ । तैपनि नागरिक समाजका हरेक तप्का सत्य तथा तटस्थ समाचारका भोका छन् । केवल चर्चामा रहनलाई सनसनी र उत्तेजना फैलाउने गरी राखिने समाचारले जनभरोसा गुमाएको छ । हामी यही भिडमा थपिने आएका होइनौँ । हामी यो डिजिटल मञ्चलाई हावादारी, उडन्ते कुरा विरुद्ध प्रयोग गर्दै प्रष्ट भरपर्दो समाचार र चोटिला विचारको माध्यम बनाउँछौं ।

हाम्रो हरेक खबरको उद्देश्य तथ्यांक र भनाइ, विश्व गतिविधिको स्थानीय प्रभाव तथा सबैभन्दा महत्वपूर्ण नागरिक समाज, सरकार तथा संसारबीचको पूल बन्नु हो । ब्रेकिङ र घटना प्रधान समाचार पत्रकारिताको सुरुवात मात्र हो । हामी त्यसभित्रका पाटोलाई पनि मजाले खोजेर पाठकसम्म ल्याउँछौं । 

हामी भुइँमा संघर्षरतदेखि विभिन्न क्षेत्रमा सफलहरुको कथा पनि समेट्छौं । ढिलो भए नि फरक पर्दैन तर प्रामाणिक खबर मात्र राख्छौँ । पत्रकारिता भनेको हतारको साहित्य हो । गल्ती भएमा सहर्ष भूल सुधार गर्छौँ । नेपाली आमसञ्चार क्षेत्रले गुमाइसकेको जनविश्वास हाम्रो यो अनलाइन मार्फत फर्काउने प्रयास गर्छौँ । 

समस्या मात्र देखाउँदैनौँ, नवीन समाधान र समुदाय लक्षित परिवर्तनमा जोड दिन्छौँ । जनमत वा जनसर्वेक्षणमा आधारित खबर हाम्रो अन्तिम गन्तव्य हो । हजुरहरुको कौतुहलताको जवाफ दिनु हाम्रो मुख्य कर्तव्य हो । कस्तो खबर पढ्न चाहनु हुन्छ ? हामीलाई खुलेर भन्नुहोला । आफ्नो व्यथाको कथा र अनुभव हामीलाई सुनाउनुहोस् । लेखेर, बोलेर र सामाजिक सञ्जालमा आएका कुरा एवं पत्र लेखेर पठाउनुहोस् । 

तपाईँहरुको स्वरले हाम्रो यात्रामा ऊर्जा थप्छ । यो अनलाइनले समाचारको मञ्चभन्दा माथिको जिम्मेबारीको भूमिकामा रहेर काम गर्छ । हामी मानवीय मूल्यका साथ सत्य–तथ्य–कथ्यको सन्तुलन प्रति कटिबद्ध छौं । हामी यो मञ्चलाई शक्तिको चलखेल हुने थलो बनाउँदैनौं । आम मान्छेका संघर्षका कथाहरुलाई प्राथमिकतामा राख्छौं । भनिन्छ नि,‘छिटो हिंडन चाहनु हुन्छ भने एक्लै अघि बढ्नुहोस्, टाढासम्म पुग्न चाहनु हुन्छ भने साथसाथ हिंडनुहोस् ।’ फेरि पनि दोहोर्‍याउँछु, हामीलाई हत्तारो छैन । हातेमालो गर्दै अघि बढौँ । 

जितेन्द्र साह
प्रधान सम्पादक