कोलकातामा भीषण आगलागीमा दुई बालबालिकासहित १४ जनाको मृत्यु

द नेप्लिज संवाददाता

१७ वैशाख २०८२, बुधबार

विराटनगर– भारतको पश्चिम बंगाल राज्यको एक होटलमा भीषण आगलागी हुँदा दुई बालबालिका सहित कम्तीमा १४ जनाको मृत्यु भएको छ । दुई जना गम्भीर घाइते भएका छन् । यो आगलागी मंगलबार राति कोलकातास्थित रितुराज होटलमा भएको थियो । हाल आगो नियन्त्रणमा ल्याइएको छ तर उद्धार कार्य अझै जारी रहेको अधिकारीहरूले बताएका छन्।

आगो कसरी सुरु भयो भन्ने विषयमा अझै स्पष्ट भइसकेको छैन। घटनाको छानबिन गर्न प्रहरीले विशेष अनुसन्धान टोली गठन गरेको छ। प्रधानमन्त्री नरेन्द्र मोदीले एक्स (पूर्व ट्विटर) मा लेख्दै ‘ज्यान गुमाउनु परेको घटनाबाट म अत्यन्त दुःखी छु’ भनेका छन् र पीडितका परिवारलाई आर्थिक सहायता दिने घोषणा गरेका छन्।

भारतका सहरहरूमा नियमनको कमजोर कार्यान्वयन र योजनाको अभावका कारण प्रायः आगलागीका यस्ता घातक घटना हुने गरेका छन्। गत वर्ष गुजरात राज्यको एक गेम्स आर्केडमा आगलागी हुँदा कम्तीमा २७ जनाले ज्यान गुमाएका थिए।

त्यसको केही महिनापछि उत्तर प्रदेशको झाँसी जिल्लास्थित एक अस्पतालको नवजात शिशु इकाइमा आगलागी हुँदा १० नवजात शिशुहरूको ज्यान गएको थियो।

कोलकाताको यो घटनामा रिपोर्टहरू अनुसार होटलका पाहुनाहरूले भवनको छानामा गएर मोबाइलको टर्च बालेर उद्धारका लागि संकेत गरेका थिए। केही भिडियोहरूमा मानिसहरू आगोबाट बच्न झ्यालबाहिरका बारन्डामा चढिरहेका देखिन्छन्।

भारतीय एक्सप्रेसले जनाएको अनुसार, अग्निनियन्त्रकहरूले ती बारन्डामा अड्किएकाहरूलाई उद्धार गर्न हाइड्रोलिक सिँढीको प्रयोग गरेका थिए। प्रहरीका अनुसार अधिकांश मृतकहरू ती पाहुना हुन् जो आफ्नो कोठाबाट बाहिर निस्कन सकेनन्।

कोलकाताका प्रहरी प्रमुख मनोज कुमार वर्माले विशेष अनुसन्धान टोलीले पाहुनाहरूले सामना गरेका कठिनाइहरू र होटलमा आगलागीबाट बच्ने मार्ग (फायर एक्जिट) सञ्चालनमा थिए वा थिएनन् भन्ने विषयमा अनुसन्धान गर्ने बताए।

पश्चिम बंगाल राज्यकी सामाजिक कल्याण मन्त्री शशी पञ्जाले यस घटनालाई दुर्भाग्यपूर्ण भनेकी छन्।

‘अग्निनियन्त्रकहरूले सबै मानिसको उद्धार गर्ने प्रयास गरे, तर केहीले निसासिएर ज्यान गुमाउनुपर्यो,’ उनले पत्रकारहरूलाई भनिन्, ‘मृतकमध्ये दुई बालबालिका पनि थिए।’

पश्चिम बंगालमा सत्तारूढ दलको विपक्षी भारतीय जनता पार्टीका नेतासमेत रहेका केन्द्रीय राज्य मन्त्री सुखान्त मजुमदारले राज्य सरकारको आलोचना गर्दै यस्ता दुर्घटना भविष्यमा नहोस् भन्नका लागि अग्नि सुरक्षा उपायहरूको कडा निगरानी गर्न माग गरेका छन्।

प्रकाशित : १७ वैशाख २०८२, बुधबार 13:16