महिमान सिंह विष्ट : सर्वोच्चका विवादित कर्मचारी

द नेप्लिज संवाददाता

१७ वैशाख २०८२, बुधबार

काठमाडौँ – महिमान सिंह विष्ट, सर्वोच्च अदालतको मुद्दा तथा रिट महाशाखामा शाखा अधिकृतको रूपमा कार्यरत एक कानुनी कर्मचारी हुन्, जसले अनधिकृत पत्र जारी गरेर अनाहकको विवाद खडा गरेका छन्। उनी मूलतः दार्चुला जिल्ला निवासी हुन् । हाल भक्तपुरमा बसोबास गर्छन्।

विष्टले पूर्वसांसद रेशम चौधरीलाई पक्राउ गर्न लेखिएको पत्र आफूले ‘होस’मै लेखेको स्वीकार गरेका छन्। हाल प्रहरी हिरासतमा रहेका विष्टले प्रारम्भिक बयानमा राष्ट्रपतिबाट दिइएको आममाफी प्रक्रियालाई पनि गलत ठहर गर्दै त्यसैको आक्रोशमा पत्र लेखेको बताएका छन्।

सर्वोच्च अदालतकै अधिकृतका रूपमा कार्यरत विष्टले चौधरीको आममाफीविरुद्ध कारागारमै पुगेर पक्राउको आदेश बुझाएका थिए। तर पत्र आधिकारिक नठहरिएपछि उनलाई नै प्रहरीले पक्राउ गरेको हो।

'म आफैंले पत्र लेखें, पूर्ण होशमा लेखें, र पत्र लिएर म आफैं कारागारसम्म गएँ,' विष्टको भनाइ उद्धृत गर्दै प्रहरी स्रोतले भन्यो, 'चौधरीलाई दिइएको कैद मिनाहा निर्णय गलत थियो। पूर्णपाठ नआई आममाफी दिइयो, यसरी दिन मिल्दैन।'

विष्टले सर्वोच्च अदालतमा खटिएका प्रहरीसँग सहयोग मागेर कारागारसम्म पुगेको प्रहरी स्रोतले जनाएको छ। हाल उनीमाथि के कारबाही गर्ने भन्नेबारेमा आन्तरिक छलफल भइरहेको छ।

प्रहरी अनुसार विष्टले बयानमा भनेका छन्, 'मैले प्रहरीलाई थप सहयोग चाहिएको बताएँ, उनीहरूको मद्दतमा म कारागार पुगेको हुँ।'

कानुनी क्षेत्रमा संलग्नता र विवादहरू

विष्टले कानुनी क्षेत्रमा लामो समयसम्म कार्य गर्दै आएका छन्। उच्च शिक्षा अध्ययनपछि उनले महेन्द्रनगरमा कानुनी अभ्यास सुरु गरेका थिए र त्यहाँ काम गर्दै गर्दा पनि विभिन्न विवादमा फसेका थिए। पछि उनी सर्वोच्च अदालतमा सरुवा भइ काम गर्न थाले।

उनका साथी र सहकर्मीहरूको अनुसार विष्टको स्वभाव र काम गर्ने शैली कहिलेकाहीँ विवादास्पद रहेको छ। विशेष गरी वकिलहरूसँगको सम्बन्धमा उनले थुप्रै पटक विवाद गरेका थिए।

अनधिकृत पत्र प्रकरण

सर्वोच्च अदालतमा कार्यरत विष्टले हालै रेशम चौधरीलाई पक्राउ गर्न अनधिकृत पत्र जारी गरेका थिए। यो पत्र प्रहरी र डिल्लीबजार कारागारमा पठाइएको थियो, तर पछि त्यो पत्र अदालतको आधिकारिक अनुमतिको बिना जारी भएको खुलेको छ। विष्टले उक्त पत्र आफैं लेखेको स्वीकार गरेका छन् र यसका बारेमा आफूलाई गहिरो व्यक्तिगत पीडाले प्रेरित गरेको बताए।

विष्ट राजनीतिक टिप्पणीमा पनि सक्रिय रहेका छन्। उनले २०७८ साउन ७ मा तत्कालीन प्रधानमन्त्री केपी शर्मा ओलीलाई कटाक्ष गर्दै सामाजिक मिडियामा टिप्पणी गरेका थिए, जुन विवादको विषय बनेको थियो। विष्टको हालको अनधिकृत पत्र प्रकरणले सर्वोच्च अदालतको प्रतिष्ठामा गम्भीर असर पुर्याएको छ। अदालतले विष्टको कार्यलाई अप्रत्याशित मान्दै उनलाई नियन्त्रणमा लिएको छ र प्रहरी अनुसन्धान गरिरहेको छ।

प्रकाशित : १७ वैशाख २०८२, बुधबार 17:48