‘कुलमानलाई हटाए आन्दोलन’

द नेप्लिज संवाददाता

२१ फागुन २०८१, बुधबार

विराटनगर– विद्युत् प्राधिकरणका महाप्रबन्धक कुलमान घिसिङलाई सरकारले दिएको शून्य अंकको विषय संसदमा जोडदार ढंगले उठेको छ । उनलाई हटाएमा आन्दोलन गर्ने चेतावनी समेत सांसदहरुले दिएका छन् । नेकपा माओवादी केन्द्रका सांसद हितराज पाण्डेले प्राधिकरणलाई निरन्तर नाफामा लगिरहेको बेला उनलाई बारम्बार स्पष्टीकरण सोध्ने मात्र नभएर शून्य नम्बर दिनु सरकारको के नियत हो ? भनेर प्रश्न गरे ।

६ महिनामा ११ अर्बभन्दा बढी नाफा कमाएको संस्थाको एमडीलाई स्पष्टीकरण सोध्ने मात्र नभएर कार्यमूल्यांकनमा शून्य अंक दिनु दुर्भाग्यपूर्ण भएको बताए । सरकारले बिचौलियाको पक्ष लिएको आरोप लगाए । उनले यस्तो कार्य नगर्न खबरदारीसमेत गरे । राष्ट्रिय स्वतन्त्र पार्टीका सांसद मनीष झाले एउटा कुलमानलाई लखेटे हजार कुलमान लिएर आउने चेतावनी दिए । राष्ट्रिय प्रजातन्त्र पार्टीका सांसद ज्ञानेन्द्र बहादुर शाहीले कुलमानलाई हटाए सदन र सडकमा आन्दोलन गर्ने बताए ।

प्रकाशित : २१ फागुन २०८१, बुधबार 18:04