सम्पादकीय टिप्पणी सहित

विराटनगर महानगरमा एमाले संस्थापन पक्षलाई अर्काे झड्का: विनाेद ढकाल प्यानल विजयी

द नेप्लिज संवाददाता

५ वैशाख २०८२, शुक्रबार

विराटनगर- नेकपा एमाले संस्थापन पक्षलाई विराटनगरमा अर्काे झड्का लागेकाे छ । एमाले विराटनगर महानगर कमिटीको दोस्रो अधिवेशनमा संस्थापन पक्षलाई पराजित गर्दै नेता विनाेद ढकाल प्यानल विजयी भएकाे हाे ।

संस्थापन पक्षका राेहित काेइरालालाई पराजित गर्दै नेता ढकाल पक्षका बलराम गिरी (नवीन) अध्यक्षमा विजयी भएका छन् । विराटनगरको पाञ्चालीस्थित पार्टी कार्यालयमा शुक्रबार बिहानका सार्वजनिक गरिएको अन्तिम मतपरिणाम अनुसार संस्थापन पक्षका कोइरालालाई ५२ मतान्तरले पराजित गर्दै गिरी विजयी भएका हुन् । गिरीले १ सय ७३ मतले विजयी हुँदा कोइरालाले १ सय २१ मत प्राप्त गर्यो ।

उपाध्यक्षमा ढकाल पक्षका सुवासप्रसाद न्यौपाने (सुरज)ले १ सय ४५ मत ल्याएर विजयी हुँदा संस्थापन पक्षका राम पोखरेल १ सय ३६ मत ल्याएर पराजित भए । उनी विराटनगर महानगर वडा ८ का बहालबाला वडाध्यक्ष हुन् ।

सचिवमा ढकाल पक्षका विज्ञान शर्मा चापागाईं १ सय ८३ मतसहित विजयी हुँदा संस्थापन पक्षका नवराज काफ्ले १ सय ४ मत ल्याएर पराजित भए । उपसचिवमा हमिद आजाद, महिला उपसचिवमा हिमा मैनाली पोखरेललगायतले विजयी भएका हुन् ।

अधिवेशनका लागि ३ सय १४ जना प्रतिनिधि थिए । बिहीबार राति मतदान सकिँदा ३ सय ८ मत खसेको थियो ।

✍ सम्पादकीय टिप्पणी : कार्यकर्ताको बदलिँदो मनोविज्ञानको संकेत
नेकपा एमालेको विराटनगर महानगर अधिवेशनको परिणामले मात्र संगठनात्मक नेतृत्वको प्रतिस्पर्धा देखाएको होइन, यसले पार्टीभित्र बढ्दो असन्तुष्टि र सन्तुलन खोज्ने प्रयासको पनि संकेत गरेको छ ।

संस्थापन पक्षको नेतृत्वमा रहेकालाई विनोद ढकाल पक्षका अपेक्षाकृत स्वतन्त्र र स्थानीय रूपमा उदीयमान नेताहरूले स्पष्ट मतान्तरले पराजित गर्नु सामान्य विषय होइन । केन्द्रीय नेतृत्वको छायामा निर्णय हुने संस्कृति र स्थानीय नेतृत्वलाई टेवा नदिने प्रवृत्तिविरुद्ध कार्यकर्ताहरूको यो मौन विद्रोह हो ।

ढकाल नेतृत्वको प्यानलको विजयलाई स्थानीय लोकतन्त्रको बलियो अभ्यासको रूपमा हेर्न सकिन्छ । तर यस्ता घटनाहरू पार्टीको केन्द्रीय सन्तुलनमा असर गर्न सक्ने सम्भावना उच्च हुन्छ, विशेषतः जब स्थानीय तहका सशक्त नेताहरू आफूलाई ’कन्फिडेन्स ब्लक’ को रूपमा उभ्याउन थाल्छन् ।

यो परिणामले एमालेलाई आन्तरिक आत्ममूल्यांकन गर्न बाध्य पार्नेछ—के संस्थापन पक्ष कार्यकर्ताको भावनासँग जोडिन सकिरहेको छ ? के स्थानीय तहमा स्वतन्त्र नेतृत्वलाई अवसर दिने तयारी छ ?

पार्टीको सुदृढीकरण संस्थापनपक्षको जितमा मात्र होइन, कार्यकर्ताको आवाज सुन्ने प्रवृत्तिमा निर्भर रहनेछ । विराटनगरको उदाहरणले देखाएको छ—पार्टीभित्र परिवर्तन चाहनेहरू मौन छैनन्, उनीहरू सशक्तरूपमा प्रस्तुत हुँदैछन् ।

प्रकाशित : ५ वैशाख २०८२, शुक्रबार 08:40