इङ्गल्याण्डमा एक विशिष्ट भवनमा आक्रमणको योजना बनाउनेहरु पक्राउ

द नेप्लिज संवाददाता

२१ वैशाख २०८२, आइतबार

बेलायत– दुई फरक आतंकवादविरोधी प्रहरी अनुसन्धानका क्रममा आठ जना पुरुषलाई पक्राउ गरिएको छ। मेट्रोपोलिटन प्रहरीका अनुसार आतंककारी योजना बनाइरहेको पाँच जनालाई शनिबार इङ्गल्यान्डका विभिन्न स्थानहरूबाट पक्राउ गरिएको हो। अनुसन्धानमा एउटा विशिष्ट भवनलाई लक्ष्य बनाइएको आशंकामा उनीहरूलाई पक्राउ गरिएको हो।

पक्राउ पर्ने पाँचमध्ये चार जनामध्ये दुई जना २९ वर्षका, एक जना ४० वर्षका र एक जना ४६ वर्षका ईरानी नागरिक हुन्। पाँचौँ व्यक्तिको उमेर र राष्ट्रियता अझै पुष्टि हुन बाँकी रहेको प्रहरीले जनाएको छ।

लण्डनमा तीन अन्य इरानी पुरुषलाई अर्को आतंकवादविरोधी अनुसन्धानअन्तर्गत पक्राउ गरिएको छ। प्रहरीले दुवै अनुसन्धानहरू एकअर्कासँग सम्बन्धित नरहेको बताएको छ।

गृह मन्त्री यभेट कुपरले देशको सुरक्षाका लागि चालेको कदमप्रति प्रहरी र सुरक्षा निकायलाई धन्यवाद दिएकी छिन्। उनले भनिन्, ‘यी गम्भीर घटनाहरू हुन्, जसले राष्ट्रिय सुरक्षासम्बन्धी खतराहरूप्रति हाम्रो प्रतिकार क्षमतामा निरन्तर सुधार आवश्यक छ भन्ने कुरा देखाउँछ।’

पाँच जनालाई समेट्ने पहिलो अपरेसनमा चार जनालाई आतंकवाद ऐन अन्तर्गत र पाँचौँ जनालाई प्रहरी र आपराधिक प्रमाण ऐन अन्तर्गत पक्राउ गरिएको हो। पाँचै जनालाई आतंकवादी गतिविधिको तयारी गरेको आशंकामा पक्राउ गरिएको हो।

स्विन्डन, पश्चिम लण्डन, स्टकपोर्ट, रोचडेल र म्यानचेस्टरबाट पक्राउ गरिएका ती सबै हाल प्रहरी हिरासतमा छन्। प्रहरीका अनुसार अनुसन्धान एक विशिष्ट भवनलाई लक्षित गरिएको योजनासँग सम्बन्धित छ।

प्रहरीले नाम नखुलाएको उक्त भवनलाई यस बारेमा जानकारी दिइसकिएको छ र आवश्यक सुरक्षा सहयोग प्रदान गरिँदैछ। यो अनुसन्धान मेट्रोपोलिटन प्रहरीको आतंकवादविरोधी इकाइको नेतृत्वमा, ग्रेटर म्यानचेस्टर प्रहरी, विल्टशायर प्रहरी र देशभरिका आतंकवादविरोधी अधिकारीहरूको सहयोगमा भइरहेको छ।

आतंकवादविरोधी इकाइ प्रमुख कमान्डर डोमिनिक मर्फीले भने, ‘अनुसन्धान प्रारम्भिक चरणमा छ, हामी यसमा समावेश हुने सम्भावित मनोवृत्ति र सार्वजनिक सुरक्षामा थप खतरा हुन सक्छ कि भन्ने विषयमा अनुसन्धान गरिरहेका छौँ।’ ‘जनतामा चिन्ता हुनु स्वाभाविक हो, तर सधैंझैँ सतर्क रहनुहोस् र कुनै शंकास्पद गतिविधि देखे वा सुनेमा तुरुन्तै हामीलाई जानकारी दिनुहोस्,’ उनले भने।

अर्को फरक अपरेसनमा मेटले तीन पुरुषहरू ३९, ४४ र ५५ वर्ष उमेरकालाई उत्तर–पश्चिम लण्डन र पश्चिम लण्डनका फरक–फरक तीन ठेगानाबाट राष्ट्रिय सुरक्षा ऐन अन्तर्गत पक्राउ गरेको जनाएको छ। उनीहरूलाई हिरासतमा राखेर घर खानतलासी भइरहेको छ। प्रहरीका अनुसार यस अपरेसनमा पक्राउको पाँच जनासँग कुनै सम्बन्ध छैन।

प्रकाशित : २१ वैशाख २०८२, आइतबार 14:38