मनमोहन स्मृति कप क्रिकेट शूरु, विभागी टिम आर्मीको विजयी सुरुवात

द नेप्लिज संवाददाता

१३ वैशाख २०८२, शनिबार

विराटनगर– एमएम कप फाउण्डेशन सुनसरीको आयोजनामा विराटनगरमा तेस्रो संस्करणको मनमोहन स्मृति एक दिवसीय क्रिकेट प्रतियोगिता शूरु भएको छ । पूर्व प्रधानमन्त्री मनमोहन अधिकारीको स्मृतिमा विराटनगरको वैजनाथपुरस्थित गिरिजाप्रसाद कोइराला अन्तर्राष्ट्रिय क्रिकेट रंगशालामा शनिबार भएको उद्घाटन खेलमा विभागीय टोली आर्मी क्लबले एपिएफलाई २ विकेटले पराजित गर्दै विजयी सुरुवात गरेको छ ।

टस हारेर ब्याटिङ गरेको एपिएफले निर्धारित ५० ओभरको खेलमा ४४ ओभर ३ बलमा सबै विकेट गुमाई १ सय ३० रन बनायो । एपिएफका प्रकाश जैशीले अविजित ३४ रन बनाउँदा कप्तान भुवन कार्कीले २५ रन, दिपक वोहराले १६ रन, अविशेक पालले १२ रन र आयूस्मान बलमे ११ रन बनाए । आर्मीका दुर्गेश गुप्ताले ३ विकेट लिँदा विशाल सुस्लिङ र नरेन साउदले २–२ विकेट लिए ।

१ सय ३१ रनको लक्ष्य पछ्याएको आर्मीले ३७ विकेट २ बलमा ८ विकेट गुमाई विजयी भएको हो । आर्मीको जितमा प्लेयर अफ द म्याच नरेन साउदले ८४ बलमा ७ चौका प्रहार गर्दै ६४ रनको योगदान दिँदा सुमित श्रेष्ठले अविजित २१ रन र पवन कार्कीले अविजित १० रनको योगदान दिए । एपिएपका दिवन पुनले ३ विकेट लिँदा कप्तान भुवन कार्की र विकाश अग्रिले २–२ विकेट लिए ।

वैशाख २० गतेसम्म सञ्चालन हुने प्रतियोगिता लिगकम नकआउटको आधारमा खेलाइएको हो । प्रतियोगितामा भारतको असाम क्रिकेट टिम, घरेलु टिम कोशी प्रदेश, बागमती प्रदेश, विभागीय टोली नेपाल पुलिस क्लब, आर्मी क्लब र सशस्त्र प्रहरी क्लबको सहभागिता रहेको छ ।

एक करोड लागतमा आयोजना भइरहेको प्रतियोगिता विजेतालाई नगद ४ लाख र ट्रफी, उपविजेतालाई २ लाख र ट्रफी, प्लेयर अफ द टुर्नामेन्टको उपाधी जित्ने खेलाडीलाई २५ हजार, उत्कृष्ट ब्याटर र बलरलाई १५–१५ हजार र प्लेयर अफ द म्याचको उपाधी जित्ने खेलाडीलाई नगद ४ हजार प्रदान गरिने आयोजकले जनाएको छ ।

प्रकाशित : १३ वैशाख २०८२, शनिबार 16:51