राष्ट्र बैंकको कायममुकायम गभर्नरमा नीलम नियुक्त

द नेप्लिज संवाददाता

२५ चैत २०८१, सोमबार

काठमाडौँ — नेपाल राष्ट्र बैंकका वरिष्ठ डेपुटी गभर्नर डा. नीलम ढुंगाना तिम्सिनालाई कायममुकायम गभर्नरको जिम्मेवारी दिइएको छ । सोमबार उपप्रधानमन्त्री एवं अर्थमन्त्री विष्णुप्रसाद पौडेलले उनलाई यो जिम्मेवारी तोकेका हुन् ।
नेपाल राष्ट्र बैंक ऐन, २०५८ को दफा २७ बमोजिम उनलाई कायममुकायम गभर्नरको जिम्मेवारी तोकिएको अर्थ मन्त्रालयले जनाएको छ ।

उनी २०७७ को फागुन २५ मा राष्ट्र बैंकको इतिहासमा पहिलो महिला डेपुटी गभर्नरका रूपमा नियुक्त भएकी थिइन् । उनले त्रिभुवन विश्वविद्यालयबाट एमबीए, अष्ट्रेलियाको वोलोङ्गोङ विश्वविद्यालयबाट अर्थशास्त्रमा स्नातकोत्तर र भारतको मेवाड़ विश्वविद्यालयबाट व्यवस्थापनमा विद्यावारिधि गरेकी छिन् ।

उनले राष्ट्र ऋण व्यवस्थापन विभाग प्रमुखको रूपमा अनुसन्धान, विदेशी विनिमय व्यवस्थापन लगायतका महत्त्वपूर्ण विभागहरूमा काम गरिसकेकी छिन् । निवर्तमान गभर्नर महाप्रसाद अधिकारीको पाँच वर्षे कार्यकाल चैत २४ मा समाप्त भएको थियो । नयाँ गभर्नर नियुक्त गर्न मन्त्री पौडेलको संयोजकत्वमा समिति गठन गरिएको भए पनि सोमबारसम्म सिफारिस भइसकेको छैन ।

प्रकाशित : २५ चैत २०८१, सोमबार 14:42