तराई–मधेसमा होली उत्साह (तस्बिरहरु र भिडियो)

विराटनगर– फाल्गुन शुक्ल पूर्णिमाको दिन हाेलिका दहन गरेको खुशियालीमा मनाइने होली पर्वले शुक्रबार तराई–मधेस उल्लासमय बनेको छ । पौराणिक, ऐतिहासिक तथा सांस्कृतिक पर्व होलीको अवसरमा एकआपसमा रंग अबिर दलेर उल्लासमय वातावरणमा जोगिरा सरर... गाउँदै खुशियाली मनाइरहेका छन् । 

होली पर्वको अवसरमा स्थानीयवासीहरुले बिहानैदेखि ठूलाबडाले सानाको निधारमा रंग अबिर लगाइदिएर सतमार्गमा लाग्ने आशिर्वाद दिनुका साथै सानाले ठूलाबडाको खुट्टामा रंग अबिर राखेर आशिर्वाद थाप्ने परम्परा छ । मधेसी समुदायमा भाउजु, सालीलाई रंग अबिर दलेर रमाइलो गर्ने र खुशियाली साट्ने परम्परा रहेको छ ।

होली पर्वको अवसरमा मधेसी समुदायले मलपुवा, पकौडा, दालपुरी, अचार, तरकारी, खिर, दही, दुधमा भांगलगायतका फलफूल मिसाइएको सर्वत खाने चलन रहेको छ । मधेसी समुदायले होली पर्वको अवसरमा कूल देउताको पूजासमेत गर्ने चलन रहेको छ । 

होली पर्वका अवसरमा युवा, वृद्धहरुले हार्मोनियम, ढोलक, मृदङ, डम्फा, झ्यालीलगायतका बाजागाजासहित आगन आगनमा गएर हाेलीकाे गीत गाउँदै मनोरञ्जन गर्ने र प्राप्त दक्षिणाले विष्णु भगवानको सामूहिक पूजा गर्ने गरिन्छ । विष्णु भगवानको प्रसाद गाउँभरि बाँड्ने संस्कृतिसमेत रहेको छ ।