सुनको मूल्यमा ऐतिहासिक वृद्धि, एकै दिनमा ५,७०० रुपैयाँ बढ्यो

द नेप्लिज संवाददाता

२८ चैत २०८१, बिहीबार

काठमाडौँ – बिहीबार सुनको मूल्यमा भारी वृद्धि भएको छ । अघिल्लो दिन तोलामा २ हजार रुपैयाँ बढेको सुन बिहीबार एकै दिनमा ५ हजार ७ सय रुपैयाँले बढेर १ लाख ८१ हजार १ सय रुपैयाँको नयाँ उच्चतम मूल्यमा पुगेको छ । यसअघि गत शुक्रबार सुनको मूल्य १ लाख ८० हजार ३ सय रुपैयाँ पुगेको थियो ।

यसैगरी चाँदीको मूल्य पनि ६५ रुपैयाँले बढेर आज १ हजार ९०० रुपैयाँ पुगेको छ । अघिल्लो दिन चाँदीको मूल्य १ हजार ८ सय ३५ रुपैयाँ थियो । सुनको मूल्यमा यो अप्रत्याशित वृद्धि अन्तर्राष्ट्रिय बजारको प्रभावले भएको हो ।

अमेरिकी राष्ट्रपति डोनाल्ड ट्रम्पले बुधबार ७५ भन्दा बढी देशहरूसँगको पारस्परिक भन्सार शुल्क ९० दिनका लागि स्थगित गरेको घोषणा गरेपछि सुनको मूल्यमा वृद्धि भएको हो । अन्तर्राष्ट्रिय बजारमा एकै दिनमा सुनको मूल्य ४ प्रतिशतभन्दा बढी बढेको छ ।

वर्तमानमा अन्तर्राष्ट्रिय बजारमा सुनको मूल्य प्रतिऔंस ३ हजार १ सय डलर नाघेको छ । यो विकसित घटनाक्रमले नेपाली बजारमा पनि सुनको मूल्यमा तीव्र उतारचढाव ल्याएको छ । उपभोक्ताहरूका लागि ठूलो चिन्ता बनिरहेको छ ।

प्रकाशित : २८ चैत २०८१, बिहीबार 12:21