फोहर फाले १५ हजार रुपैयाँ सम्म जरिवाना

द नेप्लिज संवाददाता

१७ फागुन २०८१, शनिबार

विराटनगर– काठमाडौँ महानगरपालिकाले सार्वजनिक स्थानमा फोहर फाल्नेलाई पाँच हजारदेखि १५ हजार रपैयाँसम्म जरिवाना गराउने नियम बनाएको छ । महानगरपालिकाको वातावरण विभागका अनुसार फोहरमैला सडक, फुटपाथ तथा अन्य सार्वजनिक स्थानमा फाल्ने, राख्ने र थुपार्नेजस्ता असम्भ गतिविधि गरे जरिवाना निर्धारण गरेको छ ।

जथाभाबी फोहर फाल्दा वातावरण दुषित हुनुका साथै जनस्वास्थ्यमा समेत नराम्रो असर गर्ने भएकाले पूर्ण रूपमा यस कार्यलाई प्रतिबन्ध गरिएको हो । सार्वजनिक स्थानमा फोहर फालेको अनुगमन टोलीले भेटेमा वातावरण तथा प्राकृतिक स्रोत संरक्षण ऐन, २०७७ को दफा (च) बमोजिम कारबाही हुने पनि महानगरपालिकाले स्पष्ट पारेको छ ।
महानगरपालिकाले फोहर व्यवस्थापनलाई प्रभावकारी बनाउनका लागि ३२ वटै वडामा छ वटा क्षेत्र निर्धारण गरी काम गर्ने भएको छ । छवटै क्षेत्रमा एक–एक वटा ट्रान्फरस्टेशन तयार गरी उक्त स्थानबाट फोहरको अन्तिम व्यवस्थापनका लागि ‘ल्याण्डफिल साइट’ बञ्चरेडाँडा लगिने छ । महानगरपाकिाले ३२ वटा वडालाई भौगोलिक र जनसंख्याका आधारमा ती क्षेत्रहरु निर्धारण गरेको छ ।

महानगरपालिकाले उत्पादकलाई फोहर व्यवस्थापनको जिम्मा लगाउने गर्छ । फोहरमैला व्यवस्थापन ऐन, २०६८ तथा काठमाडौँ महानगरपालिका वातावरण तथा प्राकृतिक स्रोत संरक्षण ऐन, २०७७ अनुसार फोहर स्रोतमै वर्गीकरण गर्नुपर्ने कानुनी व्यवस्था छ । हाल वडा नं ५, १०, २४, २५, २६ र २७ मा स्रोतमै फोहर वर्गीकरण भइरहेको छ ।

अब छिट्टै अन्य वडामा पनि फोहर वर्गीकरण गरेर मात्र व्यवस्थापन गर्ने तयारी महानगरपालिकाको छ । स्रोतमा उत्पादित फोहरमध्ये २० प्रतिशत बञ्चरेडाँडामा लैजाने र बाँकी सेवा प्रदायकमार्फत व्यवस्थापन गरिने छ । हाल काठमाडौँ उपत्यकाको १८ स्थानीय तहबाट दैनिक एक हजार छ सय मेट्रिक टन फोहर निस्कन्छ । साविकको सिसडोलमा व्यवस्थापन हुँदै आएको फोहर उक्त स्थान भरिएपछि विगत साढे दुई वर्षदेखि बञ्चरेडाँडामा व्यवस्थापन गरिँदैछ ।

प्रकाशित : १७ फागुन २०८१, शनिबार 15:11