टोर्नाडोले दक्षिणी अमेरिकामा कम्तिमा २० जनाको मृत्यु

द नेप्लिज संवाददाता

३ चैत २०८१, आइतबार

विराटनगर- टोर्नाडो आँधीले अमेरिकामा शनिबार दिउँसो कम्तीमा २० जनाको मृत्यु भएको छ । यसमा मिसौरीमा मात्र १२ जना परेका छन् । विनाशकारी टोर्नाडोले अमेरिकाको दक्षिणपूर्वी क्षेत्र तहसनहस बनाएको छ । सवारीसाधन उल्ट्याएको छ । घरहरू भत्काएको छ ।

टेक्सासमा भीषण धूलो आँधीका कारण सवारी दुर्घटनामा तीन जनाको मृत्यु भयो भने ओक्लाहोमा र अर्कान्सासमा पनि ज्यान गएका छन्। पावरआउटेज ट्रयाकरका अनुसार टेक्सास, मिसौरी र इलिनोइससहित छ वटा राज्यमा २ लाख ४० हजार भन्दा बढी घरमा बिजुली आपूर्ति अवरुद्ध भयो।

उक्त क्षेत्रका लागि थप खराब मौसमको पूर्वानुमान गरिएको छ, जसमा मध्य मिसिसिपी, पूर्वी लुइसियाना र पश्चिमी टेनेसीमा टोर्नाडो चेतावनी जारी गरिएको छ।

बाढी र टोर्नाडोको उच्च जोखिम

मिसिसिपी, लुइसियाना र टेनेसीसहित अलबामा र अर्कान्सासका केही भागमा आकस्मिक बाढी र बाढी चेतावनी जारी गरिएको छ। नेशनल वेदर सर्भिसले यस्ता आकस्मिक बाढीहरू प्राणघातक हुन सक्ने चेतावनी दिएको छ।

शनिबार बिहान, मध्य मिसिसिपीमा टोर्नाडो चेतावनी – जुन उच्चतम सतर्कता स्तर हो – जारी गरिएको थियो। उक्त सर्भिसले ती क्षेत्रमा 'धेरै तीव्र र शक्तिशाली लामो दूरीको टोर्नाडोहरू' देखिने सम्भावना बताएको छ र अवस्थालाई 'विशेष रूपमा खतरनाक' भनेको छ।

मौसम विज्ञान निकायले भनेको छ, 'यदि तपाईं ती क्षेत्रमा हुनुहुन्छ भने, सबैभन्दा बलियो संरचनाभित्र बस्नुस् र आँधी पार नभएसम्म सुरक्षित रहनुस्।'

मिसौरीका गभर्नरको प्रतिक्रिया

मिसौरीका गभर्नर माइक केहो ले राज्य 'भयानक आँधी र टोर्नाडोबाट तहसनहस भएको, घरहरू ध्वस्त भएका र ज्यान गुमेको' बताएका छन्। मिसौरीको आपतकालीन व्यवस्थापन एजेन्सीका अनुसार प्रारम्भिक रिपोर्टहरूले २५ जिल्लामा १९ वटा टोर्नाडो चलेको देखाएको छ।

अर्कान्सासमा तीन जनाको मृत्यु र २९ जना घाइते भएका छन्, जसले गर्दा गभर्नर सारा हक्काबी स्यान्डर्स ले आपतकालीन स्थिति घोषणा गरेकी छिन् । जर्जियाका गभर्नर ब्रायन केम्प ले पनि राज्यमा गम्भीर मौसमी प्रणाली आउन सक्ने भन्दै आपतकालीन स्थिति घोषणा गरेका छन् ।

मौसम सम्बद्ध निकायका अनुसार, टोर्नाडोको खतरा आइतबारसम्म अलाबामा, फ्लोरिडा र जर्जियासम्म फैलिन सक्छ।
ओक्लाहोमामा पनि एक जनाको मृत्यु भएको छ, सीबीएस न्युजले अधिकारीहरूलाई उद्धृत गर्दै जनाएको छ।

टेक्सासमा धूलो आँधीले सडक दुर्घटना

शुक्रबार राति टेक्सासमा आएको उही धूलो आँधीका कारण ३८ वटा गाडी एकै ठाउँमा ठोक्किए ।‌ राज्यको सार्वजनिक सुरक्षा विभागकी अधिकारी सिन्डी बार्कले ले भने, 'यो मेरो जीवनकै सबैभन्दा खराब दृश्य हो। हामीलाई धूलो नबसुञ्जेल ती गाडीहरू सबै जोडिएको थाहा थिएन।' त्यसपछि टेक्सासमा थप एक जनाको मृत्यु भएको छ।

टेक्सास र ओक्लाहोमामा आएको भीषण आँधीका कारण १०० भन्दा बढी डढेलो लागेको छ र धेरै ट्रकहरू पल्टिएका छन्।
'८४० रोड फायर' नाम दिइएको डढेलोले २७ हजार ५ सय एकड भूभाग जलाइसकेको छ र हालसम्म नियन्त्रणमा आएको छैन। ओक्लाहोमा वन सेवा विभागले प्यानह्यान्डल क्षेत्रमा 'रेड फ्ल्याग' चेतावनी जारी गरेको छ, जसले डढेलोको उच्च जोखिम दर्शाउँछ।

टोर्नाडो कसरी बनिन्छ?

टोर्नाडो तब बनिन्छ, जब तातो र चिसो हावा ठोक्किन्छन् र गड्याङगुडुङ मेघ (थन्डरक्लाउड) बनाउँछन्। विभिन्न दिशाबाट बग्ने हावाले हावाको धारलाई घुमाउने काम गर्छ, जसले घुमिरहेको भँवर (वर्टेक्स) सिर्जना गर्छ।

गत २४ घण्टामा टोर्नाडोका कारण ज्यान गुमाएका चार राज्य टोर्नाडोको लागि प्रसिद्ध मार्गमा पर्छन्।‌ यसलाई अनौपचारिक रूपमा 'टोर्नाडो एली' भनिन्छ, किनभने यहाँको भूगोल टोर्नाडो बन्नका लागि उपयुक्त छ।

सन् २०२४ मा, टोर्नाडोका कारण ५४ जनाको मृत्यु भएको थियो। त्यसमध्ये टेक्सासमा ९, ओक्लाहोमामा ८, अर्कान्सासमा ५ र मिसौरीमा १ जनाको मृत्यु भएको थियो।

टोर्नाडो एलीमा टोर्नाडो आउने उच्च समय मेदेखि जुनसम्म हुन्छ, तर मौसमविद्हरूका अनुसार टोर्नाडो वर्षभरि पनि आउन सक्छ।

प्रकाशित : ३ चैत २०८१, आइतबार 08:32