वैदेशिक रोजगार ठगीमा ६ जना पक्राउ

द नेप्लिज संवाददाता

१२ वैशाख २०८२, शुक्रबार

काठमाडौँ – वैदेशिक रोजगारीका नाममा रकम ठगी गर्ने दुई फरक घटनामा ६ जना पक्राउ परेका छन् । यसमा पाँच बंगलादेशी नागरिक र एक नेपाली नागरिकलाई प्रहरीले पक्राउ गरेको हो ।

प्रथम घटनामा बंगलादेशी नागरिकहरूलाई नेपाल हुँदै विभिन्न देशहरूमा वैदेशिक रोजगारको लागि पठाइदिन्छु भन्दै रकम ठगी गरेको अभियोगमा बंगलादेशी नागरिकहरु नै पक्राउ परेका छन् । पक्राउ पर्नेहरूमा ५० वर्षीय मोहम्मद मोस्ताफिजुर रहमान, ४१ वर्षीय मुहम्मद फारहद हुसेन चौधरी, ४६ वर्षीय अबु युसुफ एमडी हनीफ, ४७ वर्षीय मिल्टन शहाबाद हुसेन र ४० वर्षीय अजिम मोलिक रहेका छन् ।

यस घटनामा उनीहरूले बंगलादेशी नागरिकहरूलाई नेपाल बोलाइ अष्ट्रेलिया, इटाली, स्पेन, फ्रान्स, सर्भिया, अल्बानिया जस्ता मुलुकमा पठाउने भनी प्रति व्यक्तिबाट ३ हजार ५ सय अमेरिकी डलरको दरमा रकम असुलेका थिए । १३ जना पीडितहरूबाट ४५ हजार ५ सय अमेरिकी डलर असुलेर उनीहरू सम्पर्कविहीन भएका थिए ।

प्रहरीको उजुरीको आधारमा उनीहरूलाई काठमाडौँ–९ स्थित सिनामंगलको शिव सताक्षी गेष्ट हाउसबाट पक्राउ गरिएको हो । उनीहरूको साथबाट १९ थान राहदानी, ४ थान मोबाइल, ९ हजार ८ सय ५० अमेरिकी डलर, ३९ हजार ९ सय ५ बंगाली टाका र २५ हजार नेरु बरामद गरिएको छ ।

दोस्रो घटनामा अजरबैजान पठाइदिन्छु भन्दै रकम ठगी गरेको आरोपमा काठमाडौँ–१६ बस्ने गोरखा अजिरकोट गाउँपालिका–४ का २२ वर्षीय अनिल देवकोटालाई प्रहरीले पक्राउ गरेको छ । देवकोटाले दुई पीडितहरूबाट ६ लाख नेरु लिइ सम्पर्कविहीन भएका थिए । उजुरीका आधारमा उनलाई काठमाडौँ–११ बबरमहलबाट पक्राउ गरिएको हो । प्रहरीले यी घटनामा संलग्नहरूलाई आवश्यक अनुसन्धान र कारबाहीको लागि सम्बन्धित निकायमा पठाएको छ ।

प्रकाशित : १२ वैशाख २०८२, शुक्रबार 19:17