इजरायली हवाई आक्रमणमा लेबनानमा दुईको मृत्यु, आठ घाइते

९ चैत २०८१, शनिबार

बेरुत (लेबनान)– नोभेम्बरको युद्धविरामपछि पहिलो पटक लेबनानबाट इजरायलमा रकेट आक्रमण भए पछि इजरायली सेनाले दक्षिणी लेबनानमा हिजबुल्लाहका रकेट प्रक्षेपण स्थलहरू र कमाण्ड केन्द्रमा आक्रमण गरेको छ । प्रधानमन्त्री बेन्जामिन नेतान्याहुले इजरायली रक्षा बललाई ‘दर्जनौं आतङ्ककारी लक्ष्यहरूमा बलपूर्वक कारबाही गर्न’ निर्देशन दिएको बताएका छन् ।

लेबनानको स्वास्थ्य मन्त्रालयका अनुसार इजरायली आक्रमणमा एक बालक सहित कम्तिमा दुई व्यक्तिको मृत्यु भएको छ । आठ जना घाइते भएका छन् । प्रधानमन्त्री नवाफ सलामले आफ्नो देशलाई ‘नयाँ युद्धमा तान्न नहुने’ चेतावनी दिएका छन्।

इरान समर्थित हिजबुल्लाहले रकेट आक्रमणमा आफ्नो संलग्नता अस्वीकार गर्दै १४ महिनाको लडाइँ अन्त्य गर्ने सम्झौताप्रति प्रतिबद्ध रहेको बताएको छ । इजरायलले नोभेम्बरको युद्धविराम पछि पहिलो पटक लेबनानबाट रकेट प्रहार भए पछि दक्षिणी लेबनानमा हिजबुल्लाहका रकेट प्रक्षेपण स्थलहरू र कमाण्ड केन्द्रमा आक्रमण गरेको छ ।

इरानद्वारा समर्थित सशस्त्र समूह हिजबुल्लाहले रकेट आक्रमणमा आफ्नो संलग्नता अस्वीकार गर्दै १४ महिनाको लडाइँ अन्त्य गर्ने सम्झौताप्रति प्रतिबद्ध रहेको बताएको छ । लेबनानस्थित संयुक्त राष्ट्रसंघीय शान्ति सेना (युनिफिल) ले सम्भावित हिंसात्मक वृद्धि प्रति चिन्ता व्यक्त गर्दै इजरायल र लेबनान दुवैलाई प्रतिबद्धता पालना गर्न आह्वान गरेको छ ।

इजरायली रक्षा बल (आईडीएफ) का अनुसार बिहान उत्तरी इजरायली सहर मेटुलामा तीन रकेट प्रहार भएका थिए जसमा कुनै हताहत भएन । केही घण्टा पछि लेबनानी सेनाले खोजी अभियान सञ्चालन गरी ‘तीनवटा प्रिमिटिभ रकेट लन्चरहरू’ फेला पारी निष्क्रिय गरेको बताएको छ ।

शनिबारको रकेट आक्रमणले लेबनानी सरकारमाथि थप दबाब सिर्जना गर्नेछ र इजरायलले लेबनानी सेनाले सीमा क्षेत्रहरूमा पूर्ण नियन्त्रण नभएको प्रमाणको रूपमा प्रयोग गर्न सक्छ । इजरायलका निरन्तर आक्रमणहरूको बाबजुद, हिजबुल्लाहले प्रतिकार गरेको छैन । उक्त समूहले युद्धबाट प्रभावित आफ्ना समुदायहरूलाई आर्थिक सहायता प्रदान गर्नुपर्ने चुनौती र आफ्ना विपक्षीहरूबाट निरस्त्रीकरणको दबाबको सामना गरिरहेको छ ।

जनवरीमा सत्तामा आएका लेबनानका राष्ट्रपति जोसेफ आउनले देशमा केवल राज्यसँग मात्र हतियार हुनुपर्ने बताएका छन्, जसलाई हिजबुल्लाहको हतियारको सन्दर्भमा हेरिएको छ । लेबनानका अन्तर्राष्ट्रिय साझेदारहरूले सरकारलाई हिजबुल्लाहको शक्तिलाई सीमित गर्न कदम चाल्न आग्रह गरेका छन् ।

हिजबुल्लाहले ७ अक्टोबर २०२३ मा दक्षिणी इजरायलमा हमासको आक्रमणको भोलिपल्ट आफ्नो अभियान सुरु गरेको थियो, गाजा पट्टीका प्यालेस्टिनीहरूसँग ऐक्यबद्धता जनाउँदै । दीर्घकालीन द्वन्द्व तीव्र भई लेबनानभरि इजरायली हवाई आक्रमण, हिजबुल्लाहका वरिष्ठ नेताहरूको हत्या र दक्षिणी लेबनानमा स्थलीय आक्रमण भएको थियो ।

यस आक्रमणमा लेबनानमा करिब ४ हजार व्यक्तिको मृत्यु भएको थियो, जसमा धेरैजसो सर्वसाधारण थिए । सेप्टेम्बरदेखि नोभेम्बरसम्म १२ लाखभन्दा बढी बासिन्दा विस्थापित भएका थिए । इजरायलको हिजबुल्लाहविरुद्धको युद्धको घोषित उद्देश्य देशको उत्तरमा समूहको आक्रमणका कारण विस्थापित भएका करिब ६० हजार बासिन्दाको फिर्ती सुनिश्चित गर्नु र समूहलाई सीमा क्षेत्रबाट हटाउनु थियो ।

प्रकाशित : ९ चैत २०८१, शनिबार 19:44