गाजा क्षेत्रमा भएको आक्रमणमा ३४ जनाको मृत्यु

द नेप्लिज संवाददाता

५ चैत २०८१, मङ्गलबार

विराटनगर – इजरायलले गाजा क्षेत्रमा पुनः हवाई आक्रमण गर्दा ३४ प्यालेस्टिनीको मृत्यु भएको र ७० जना घाइते भएको गाजाको सिभिल डिफेन्स एजेन्सीले जनाएको छ।

इजरायली सेनाले हमासका क्याम्पहरूलाई लक्षित गरी आक्रमण गरेको जनाएको छ। चिकित्सक र प्रत्यक्षदर्शीहरूका अनुसार, मध्य गाजाको देर अल बलाहमा तीन घर, खान युनिस र सफाहका भवनहरूमा आक्रमण भएको छ।

गाजामा सन् २०२५ को जनवरी १९ देखि युद्धविराम कार्यान्वयनमा आएको थियो। पहिलो चरणको युद्धविराम मार्च १ मा समाप्त भएको थियो। दोस्रो चरणको युद्धविरामको प्रयास भइरहेका बेला इजरायलले हमास लक्षित आक्रमण गरेको हो। बीबीसीले यो आक्रमणलाई युद्धविरामपछिको सबैभन्दा ठूलो हमला भनेको छ।

इजरायलका प्रधानमन्त्री बेन्जामिन नेतन्याहु र रक्षामन्त्री इसराइल काट्जको निर्देशनमा मंगलबार बिहान गाजा क्षेत्रमा आक्रमण गरिएको प्रधानमन्त्री कार्यालयले जनाएको छ। विज्ञप्तिमा हमासले बन्दी रिहाइ गर्न इन्कार गरेको र अमेरिकी राष्ट्रपतिका विशेष प्रतिनिधि विट काफ र अन्य मध्यस्थकर्ताहरूले राखेको प्रस्ताव नमानेकाले आक्रमण गरिएको उल्लेख छ।

अन्तर्राष्ट्रिय समुदायले यस आक्रमणप्रति चासो व्यक्त गरेको छ। संयुक्त राष्ट्रसंघले दुवै पक्षलाई संयमित रहन र वार्तामार्फत समस्याको समाधान खोज्न आह्वान गरेको छ। यस आक्रमणले क्षेत्रीय स्थायित्वमा नकारात्मक प्रभाव पार्न सक्ने चेतावनी पनि दिइएको छ।

इजरायल र हमासबीचको यो पछिल्लो तनावले गाजा क्षेत्रमा पुनः हिंसा भड्किएको छ। युद्धविरामको प्रयास भइरहेका बेला भएको यो आक्रमणले क्षेत्रीय स्थायित्व र शान्ति प्रक्रियामा चुनौती खडा गरेको छ। अन्तर्राष्ट्रिय समुदायले दुवै पक्षलाई वार्तामार्फत समस्याको समाधान खोज्न जोड दिएको छ।

प्रकाशित : ५ चैत २०८१, मङ्गलबार 10:06