क्रिप्टोकरेन्सीको राष्ट्रिय भण्डारण गर्दै ट्रम्प

द नेप्लिज संवाददाता

२३ फागुन २०८१, शुक्रबार

विराटनगर– अमेरिकी राष्ट्रपति डोनाल्ड ट्रम्पले बिटक्वाइन क्रिप्टोकरेन्सीका निम्ति रणनीतिक ‘रिजर्भ’ स्थापना गर्न कार्यकारी आदेशमा हस्ताक्षर गरेका छन् । यो आदेशसँगै अमेरिकाले ‘ब्लकचेन’ सम्पत्ति मानिने क्रिप्टोको राष्ट्रिय भण्डार गर्दै जानेछ ।

ट्रम्पको घोषणापछि बिटक्वाइन, इथरियम, एक्सआरपी, सोलाना र कार्डानोलगायत क्रिप्टोकरेन्सीको मूल्य बढिरहेको छ । विभिन्न देशले वित्तीय जोखिमबाट बच्न राष्ट्रिय सम्पत्तिको रणनीतिक भण्डार गर्छन् । अमेरिकासँग पेट्रोलियमको र क्यानडासँग मेपल सिरपको भण्डार छ । अमेरिकी सरकारसँग यसअघि नै १७.५ अर्ब अमेरिकी डलरबराबरको दुई लाख बिटक्वाइन छ ।

ह्वाइट हाउसका एआई एवं क्रिप्टो जार डेभिड स्याक्सले फौजदारी वा सिभिल कारबाहीबाट जफत गरिएको क्रिप्टोलाई संघीय सरकारको क्रिप्टोकरेन्सी रिजर्भमा राखिने बताएका छन् । अमेरिकाले रिजर्भमा जम्मा गरेको बिटक्वाइन नबेच्ने गरी सम्पत्तिका रूपमा राखिने उनले बताए । ट्रम्पले यो विषयमा थप विवरण दिनका लागि शुक्रबार ह्वाइट हाउसमा पहिलो क्रिप्टो सम्मेलन गर्दैछन् ।

प्रकाशित : २३ फागुन २०८१, शुक्रबार 13:01