तीनकुने घटनामा निष्पक्ष छानबिनको माग गर्दै प्रतिपक्षी दलहरू

द नेप्लिज संवाददाता

१८ चैत २०८१, सोमबार

काठमाडौँ — गत शुक्रबार तीनकुनेमा भएको हिंसात्मक घटनाप्रति गम्भीर चिन्ता व्यक्त गर्दै प्रतिपक्षी दलहरू राष्ट्रिय स्वतन्त्र पार्टी (रास्वपा) र राष्ट्रिय प्रजातन्त्र पार्टी (राप्रपा) ले उच्चस्तरीय न्यायिक छानबिन आयोग गठन गर्न माग गरेका छन् ।
राप्रपा अध्यक्ष राजेन्द्र लिङ्देनले उक्त घटनाप्रति दुःख व्यक्त गर्दै निष्पक्ष छानबिनको माग गरेका छन् । उनले घटनामा ज्यान गुमाएका सञ्चारकर्मी सुरेश रजक र अर्का युवक चालक सविन महर्जनलाई सहिद घोषणा गर्न पनि माग गरे ।

रास्वपाका कार्यबाहक प्रवक्ता मनिष झाले कुनै एउटा पक्षलाई मात्र दोष दिएर सरकार उम्किन नहुने बताए । उनले भने, ‘तीनकुनेको त्यो अराजकता र उदण्डताको विरोध गर्छौं । तर यसमा कुनै एउटा पक्षमात्र जिम्मेवार छैनन् । ज्यान गुमाएका युवा सविन महर्जनलाई पछाडिबाट गोली हानेको भिडियो बाहिरिएका छन् । उनी भागेका पनि थिएनन्, ढुंगा हानिरहेका थिएनन् । पत्रकार सुरेश रजकको मृत्यु पनि शंकास्पद छ । यो घटनामा उच्चस्तरीय छानबिन आयोगको माग गर्दछौँ ।’

पत्रकार रजकका परिवारले गृहमन्त्रीसमक्ष उनलाई सहिद घोषणा गर्न, उचित क्षतिपूर्ति दिन र दोषीलाई कारबाही गर्न माग गरेका छन् । यस घटनामा नेपाल प्रहरीका ५३ जना, सशस्त्र प्रहरी बलका २२ जना र प्रदर्शनकारीतर्फ ३५ जना घाइते भएका छन् ।

साथै नौ वटा सरकारी सवारी र छ वटा निजी सवारी साधनमा आगजनी भएको छ । विभिन्न १४ स्थानमा आगजनी, नौ वटा संस्थामा तोडफोड र एक स्थानमा लुटपाट भएको प्रहरीले जनाएको छ । तीनकुने घटनाले मुलुकमा शान्ति, स्थायित्व र विधिको शासन सुनिश्चित गर्न सबै पक्षलाई संयमित रहन र समस्याको समाधान संवाद र समझदारीबाट खोज्न आवश्यक रहेको देखाएको छ ।

प्रकाशित : १८ चैत २०८१, सोमबार 17:48