पहिलो प्रदेश लगानी सम्मेलन कोशीमा हुँदै

द नेप्लिज संवाददाता

३ वैशाख २०८२, बुधबार

विराटनगर– कोशी प्रदेश सरकारले मुलुकमा पहिलो पटक प्रदेश लगानी सम्मेलन आउँदो बैसाख १८ र १९ गते गर्न लागेको छ । कोशी प्रदेश लगानी सम्मेलनको सचिवालयले बुधबार पत्रकार सम्मेलन गरी लगानी सम्मेलनको तयारी अन्तिम चरणमा पुगेको जानकारी दिए ।

सचिवालयका संयोजक पवनकुमार तिम्सिनाले लगानी सम्मेलनमा ७ वटा क्षेत्रका ५४ वटा परियोजना लगानीकर्त्ताहरुका लागि ‘शोकेसिङ’ गर्ने तयारी गरिएको बताएका छन् । लगानी सम्मेलनमार्फत उक्त ५४ वटा परियोजना १ खर्ब ३९ अर्ब ३० करोड ५२ लाखको लागतमा सार्वजनिक निजी साझेदारीमा निर्माण गर्दै रोजगारी सिर्जना गरी राष्ट्रिय पूँजी निर्माण गर्ने प्रदेश सरकारको तयारी छ ।

प्रदेश लगानी प्राधिकरणका प्रमुख कार्यकारी निर्देशक डा. सरोज कोइरालाले पर्यटन, पूर्वाधार, कृषि, उद्योग, उर्जा, सूचना प्रविधि, फोहोर मैला व्यवस्थापन गरी ७ वटा क्षेत्रका ५४ परियोजना लगानी सम्मेलनमा ‘शोकेसिङ’ गर्ने तयारी रहेको बताएका छन् । उनले थप ३१ अर्ब २ करोडका १५ वटा परियोजना तयार गर्ने काम भइरहेको बताएका हुन् ।

‘लगानी सम्मेलनको पहिलो दिन उद्घाटन भएपछि दुई चरणको प्रदेशको समग्र अवस्थितिको बारेमा लगानीकर्त्ताहरुलाई साक्षात्कार गराउने छौँ,’ उनले भने, ‘दोस्रो दिन ३ वटा शेसनमा परियोजनाहरुको बारेमा लगानीकरत्र्ताहरुलाई सम्पूर्ण जानकारी गराउने र अन्त्यमा लगानी गर्न इच्छुक लगानीकर्त्तासँग समझदारी पत्रमा हस्ताक्षर गर्ने कार्यक्रम तय गरिएको छ ।’ उनले तयारी अवस्थामा रहेको ५४ वटा परियोजनामध्ये अधिकांश परियोजनामा लगानी जुटाउन लगानीकर्त्ताहरुसँग निरन्तर छलफल भइरहेकोले न्यूनतम १ अर्बको सम्झदारी पत्रमा हस्ताक्षर गर्ने लगानी सम्मेलनको लक्ष्य रहेको जानकारी दिए ।

मुख्यमन्त्री हिक्मतकुमार कार्कीले प्रदेशलाई लगानीमैत्री बनाउनका लागि कानूनी तथा नीतिगत सुधारको प्रक्रिया अन्तिम चरणमा पुगेको बताएका छन् । उनले प्रदेश सरकारबाट गर्नुपर्ने र संघीय सरकारबाट गर्नुपर्ने कानुनी तथा नीतिगत सुधारको कार्ययोजना तयारी गरेर तत्काल सुधारका प्रक्रिया अगाडि बढाउने तयारीमा रहेको बताए ।

प्रकाशित : ३ वैशाख २०८२, बुधबार 16:33