कोशी प्रदेशसभाको बजेट अधिवेशन आज सुरु हुँदै

द नेप्लिज संवाददाता

४ जेठ २०८२, आइतबार

विराटनगर– कोशी प्रदेशसभाको सातौं तथा बजेट अधिवेशन आइतबार दिउँसो २ बजेबाट प्रदेशसभामा सुरु हुँदै छ । प्रदेश सरकारको सिफारिसमा प्रदेश प्रमुख पर्शुराम खापुङ्ले संविधानको धारा १८३ को उपधार (१) अनुसार आइतबार दिउँसो २ बजे प्रदेशसभाहल विराटनगरमा आह्वान गरेका छन् ।

सभामुख अम्बर बहादुर विष्टले प्रदेशसभा नियमावली २०७४ को नियम ३ को उपनियम (१) बमोजिम प्रदेशसभाको सातौँ अधिवेशन आह्वानको सूचना प्रदेशसभा सदस्यहरुका लागि प्रदेशसभा सचिव गौतम राज आमात्यले सार्वजनिक सूचना जारी गरेका हुन् ।

प्रदेशसभाको सातौँ अधिवेशनको पहिलो बैठकको कार्यसूची प्रदेशसभा सचिव आमात्यले सार्वजनिक गरेका छन् । प्रदेशसभाको आइतबार बस्ने बैठकमा प्रदेश प्रमुखको कार्यालयबाट प्राप्त पत्रहरुको वाचन, केही प्रदेश ऐनलाई संशोधन गर्न बनेको अध्यादेश २०८२ प्रदेशसभामा टेबल गर्ने र प्रदेशसभामा प्रतिनिधित्व गर्ने राजनीतिक दलको तर्फबाट सभामा धारणा राख्ने कार्यसुची रहेको प्रदेशसभा सचिव आमात्यले जनाएका हुन् ।

प्रदेश सरकारले पहिलो लगानी सम्मेलन आयोजना गर्ने क्रममा प्रदेशमा लगानीमैत्री वातावारण बनाउन अध्यादेशमार्फत ८ वटा ऐन संशोधन गरेको थियो । उक्त अध्यादेश आज प्रदेशसभामा टेबल गर्नैपर्ने संवैधानिक व्यवस्था छ ।

प्रकाशित : ४ जेठ २०८२, आइतबार 08:20