मुस्ताङमा ८९४ किलोग्राम शालिग्राम बरामद

द नेप्लिज संवाददाता

१ वैशाख २०८२, सोमबार

जोमसोम– मुस्ताङको वारागुङ मुक्तिक्षेत्र–३ स्थित छुसाङ चेकपोस्टमा प्रहरीले ठूलो परिमाणमा शालिग्राम शिला बरामद गरेको छ । जिल्ला प्रहरी कार्यालय मुस्ताङका अनुसार ३४ वटा सेतो बोराभित्र लुकाएर राखिएको ८९४ किलोग्राम शालिग्राम एक बोलेरो जीपबाट फेला पारिएको हो ।

लोघेकर दामोदरकुण्ड गाउँपालिका–३, घमीबाट जोमसोमतर्फ आउँदै गरेको ग ३ च ८१५२ नम्बरको बोलेरो जीप चेकजाँच गर्दा उक्त शालिग्राम बरामद गरिएको प्रहरी निरीक्षक विशाल अधिकारीले जानकारी दिए । उक्त जीप लोघेकर दामोदरकुण्ड–५, सुर्खाङ निवासी ४१ वर्षीय कुनसाङ रेन्जिङ गुरुङको रहेको खुलेको छ ।

शालिग्रामसहित बोलेरो जीपसहित चालक र शालिग्राम ओसारपसारमा संलग्नलाई प्रहरीले नियन्त्रणमा लिएर थप अनुसन्धानका लागि अन्नपूर्ण संरक्षण कार्यालय (एक्याप) जोमसोममा बुझाएको जनाएको छ । एक्याप जोमसोमका कार्यालय प्रमुख राजेश गुप्तका अनुसार उनीहरूलाई हाल अनुसन्धानका लागि पोखरास्थित एक्यापको प्रधान कार्यालय पठाइएको छ ।

मुस्ताङको दामोदरकुण्ड हुँदै कालिगण्डकी नदीमा जम्मा हुने शालिग्राम हिन्दू धर्मशास्त्रअनुसार भगवान विष्णुको प्रतीकका रूपमा पूजनीय मानिन्छ । शालिग्राम शिला व्यावसायिक रूपमा ओसारपसार गर्न कानुनतः प्रतिबन्ध छ । त्यसैले प्रशासन, प्रहरी र एक्यापले अवैध कारोबार नियन्त्रणका लागि निगरानी कडा गर्दै आएको छ । तर व्यक्तिगत पूजा प्रयोजनका लागि सीमित मात्रामा शालिग्राम खरिद गरी लैजान भने प्रशासन, प्रहरी र एक्यापले छुट दिँदै आएको छ ।

प्रकाशित : १ वैशाख २०८२, सोमबार 13:36