कूटनीति र पर्यटनको संगम

कन्याममा १५ देशका राजदूत, घोडचढी गर्दै चिया बगानको परिक्रमा

द नेप्लिज संवाददाता

३१ चैत २०८१, आइतबार

विराटनगर – नयाँ वर्ष २०८२ को पूर्वसन्ध्यामा नेपालस्थित विभिन्न देशका राजदूत र अन्तर्राष्ट्रिय संगठनका प्रमुखहरू पूर्वी नेपालको प्रसिद्ध पर्यटकीय गन्तव्य कन्याममा रमाइरहेका छन् । परराष्ट्र मन्त्रालयको पहलमा आइतबार इलामको कन्याममा आयोजित विशेष रिट्रिट कार्यक्रममा उनीहरूले चियाबारीको सुन्दरता अवलोकन मात्र गरेनन्, घोडामा चढेर कन्यामको परिक्रमा समेत गरे ।

परराष्ट्र मन्त्रालय, नेपाल पर्यटन बोर्ड र इलामको सूर्योदय नगरपालिकाको सहआयोजनामा भएको यो कार्यक्रम नेपालमा कार्यरत विदेशी कूटनीतिज्ञहरूको सहभागितामा आयोजना गरिएको हो । कार्यक्रममा बेलायत, जापान, अष्ट्रेलिया लगायत १५ भन्दा बढी देशका राजदूत तथा दूतावास प्रतिनिधिहरू सहभागी थिए ।

उनीहरूलाई विभिन्न जातजातिको सांस्कृतिक पहिरनमा सजाइएको थियो जसले स्थानीय विविधताको झलक दिने उद्देश्य राखिएको थियो । परराष्ट्र मन्त्रालयका अनुसार नेपालको पर्यटन प्रवद्र्धन, क्षेत्रीय विविधता र स्थानीय विशेषतालाई अन्तर्राष्ट्रिय समुदायमा चिनाउन कन्यामलाई रोजिएको हो । दुईदिने यो कार्यक्रम चैत ३१ र वैशाख १ सम्म सञ्चालन हुनेछ ।

कार्यक्रममा परराष्ट्र मन्त्री डा. आरजु राणा देउवा, परराष्ट्र सचिव अमृत बहादुर राई र मन्त्रीका प्रेस सल्लाहकार एकराज पाठकसहित उच्च अधिकारीहरू सहभागी छन् । कन्यामको हरियाली चियाबारी, प्राकृतिक सौन्दर्य र ग्रामीण जीवनशैलीको साक्षात् अनुभूति गराउन विदेशी कूटनीतिज्ञलाई आमन्त्रण गरिएको यो कार्यक्रमले नेपालको ‘पब्लिक डिप्लोमेसी’ (जन कूटनीति) लाई सशक्त बनाउने मन्त्रालयको विश्वास छ ।

प्रकाशित : ३१ चैत २०८१, आइतबार 20:46