बंगलादेशमा राजनीतिक संकट

अन्तरिम सरकारको चुनौती

द नेप्लिज संवाददाता

२७ चैत २०८१, बुधबार

विराटनगर– बंगलादेशकी पूर्वप्रधानमन्त्री शेख हसिनाले हालै एक अनलाइन सम्बोधनमा अन्तरिम सरकारका प्रमुख सल्लाहकार मोहम्मद युनुसलाई शासनसत्तामा कुनै संवैधानिक वैधता नभएको बताएकी छन् । गत वर्ष अगस्टमा हिंसात्मक विद्यार्थी आन्दोलनपछि हसिना भारत प्रस्थान गरेकी थिइन् । त्यसपछि युनुसको नेतृत्वमा अन्तरिम सरकार गठन गरिएको थियो ।

हसिनाले सम्बोधनमा भनिन्, ‘संविधान अनुसार जनताको निर्वाचित प्रतिनिधि र संसद सदस्यहरूको छनोट गरिएको उम्मेदवारको रूपमा, म बंगलादेशको प्रधानमन्त्री हुँ । उनीहरूको शक्ति (मोहम्मद युनुसको अन्तरिम सरकार) को कुनै वैधता छैन ।’

यसैबीच अन्तरिम सरकारका अधिकारीहरूले अवामी लिगलाई आगामी निर्वाचनमा भाग लिन नदिने घोषणा गरेका छन् । महफुज आलम, अन्तरिम सरकारका एक प्रमुख सल्लाहकार, भन्छन्, ‘चुनावहरू केवल प्रगतिशील बंगलादेश समूहहरू बीचमा मात्र हुनेछ । अवामी लिगलाई यस देशमा पुनस्र्थापना गर्न दिइने छैन ।’

मोहम्मद युनुसले शेख हसिनाको शासनकाललाई ‘फासिवादी’ भन्दै उनले देशका सबै संस्थाहरू ध्वस्त पारेकी आरोप लगाएका छन् । उनले भनेका छन्, ‘हामीलाई अर्थतन्त्र, शासन, प्रशासन र न्यायपालिकामा व्यापक सुधारहरू आवश्यक छन् ।’

बंगलादेशमा हाल राजनीतिक अस्थिरता जारी छ । अन्तरिम सरकारले सुधारहरू लागू गरेपछि मात्र निर्वाचन गर्ने योजना बनाएको छ । भारतमा शरण लिएकी शेख हसिनाको सुपुर्दगीको माग बंगलादेश सरकारले गर्दै आएको छ । बंगलादेशको वर्तमान राजनीतिक परिदृश्यले देशको भविष्यमा गम्भीर प्रभाव पार्ने देखिन्छ । अन्तर्राष्ट्रिय समुदायले यसलाई नजिकबाट नियालिरहेको छ ।
(द टाइम्स अफ इन्डिया, ढाका ट्रिब्यून र द गार्डियनको समाचारमा आधारित)

प्रकाशित : २७ चैत २०८१, बुधबार 12:39