हिसान कोशी प्रदेशस्तरीय अन्तर कलेज क्रिकेटको उपाधि अरनिको कलेजलाई

द नेप्लिज संवाददाता

२८ फागुन २०८१, बुधबार

विराटनगर– हिसान कोशीको आयोजना तथा हिसान मोरङको संयोजनमा विराटनगरमा बुधबार सम्पन्न प्रथम कोशी प्रदेशस्तरीय अन्तर कलेज क्रिकेट प्रतियोगिताको उपाधि विराटनगरको अरनिको कलेजले जितेको छ ।

अरनिको कलेजले दोस्रो पटक ग्रिनल्याण्ड कलेजलाई ६४ रनले पराजित गर्दै उपाधि रक्षा गरेको हो । अरनिकोले माघ १५ गते विराटनगरमा सम्पन्न मोरङ हिसान क्रिकेट प्रतियोगिताको फाइनलमा ग्रिनल्याण्ड कलेजलाई पराजित गरी उपाधि जितेको थियो ।

विराटनगरको वैजनाथपुर क्रिकेट मैदानमा भएको फाइनल खेलमा टस जितेर ब्याटिङ गरेको अरनिकोले निर्धारित २० ओभरमा ८ विकेट गुमाई १ सय ४३ रन बनाएको थियो । अरनिकोका सोनु साहले ४४ रन बनाउँदा नुमिर अहमदले ३६ रन र सौरभ झाले २३ रनको योगदान दिएका थिए । ग्रिनल्याण्डका गणेश यादवले ३ विकेट लिँदा सुनिल यादव र गौरी शंकर यादवले २–२ विकेट लिएका थिए ।

१ सय ४४ रनको लक्ष्य पछ्याएको ग्रिनल्याण्डले निर्धारित १८ दशमलव ४ बलमा सबै विकेट गुमाई ७९ रनमा सिमित भयो । ग्रिनल्याण्डका हेमन्त मेहताले १८ रन बनाउँदा सुनिल यादवले १३ रनको योगदान दिए । अरनिकोका रामनारायण यादवले र अमर यादवले समान ३/३ विकेट लिए ।

प्रतियोगिताको प्लेयर अफ द म्याच अरनिकोका नुमिर अहमद घोषित भए भने प्लेयर अफ टुर्नामेन्ट ग्रिन ल्याण्डका गणेश यादव भए । त्यस्तै उत्कृष्ट ब्याटर अरनिकोका रुद्रप्रताप साह घोषित हुँदा उत्कृष्ट बलर अरनिकाकै अमर यादव घोषित भए ।

फागुन २६ गतदेखि शुरु भएको प्रतियोगितामा कोशी प्रदेशका मोरङ, सुनसरी र झापाका गरी ६ टिम सहभागि थिए । विजयी टिम तथा खेलाडीहरुलाई हिसानका केन्द्रीय उपाध्यक्ष भेषराज पोखेल, हिसान कोशी अध्यक्ष ज्ञानबहादुर खडका र हिसान मोरङका पूर्व अध्यक्ष बलराम पन्तलगायतले ट्रफी तथा प्रमाण पत्र वितरण गरे ।

प्रकाशित : २८ फागुन २०८१, बुधबार 16:34