रंगेलीका विकास भारती विद्युतीय कारोबार ठगीमा काठमाडौंमा पक्राउ

द नेप्लिज संवाददाता

१२ चैत २०८१, मङ्गलबार

विद्युतीय कारोबार ऐन, २०६३ बमोजिम कसुर गर्ने दुई जनालाई आइतबार प्रहरीले पक्राउ गरेको छ । यी दुई व्यक्तिहरूले अनधिकृत रूपमा हवाई टिकट खरिद–बिक्री प्रणालीमा पहुँच पुर्याई अवैध लाभ उठाउने प्रयास गरेको अभियोगमा पक्राउ परेका छन् ।

काठमाडौं– विद्युतीय कारोबार ऐन, २०६३ बमोजिम कसुर गर्ने कार्यमा संलग्न रहेको आरोपमा २ जनालाई आइतबार प्रहरीले पक्राउ गरेको खुलासा भएको छ । केन्द्रीय प्रहरीका अनुसार पक्राउ पर्नेहरू मोरङ रंगेली नगरपालिका–७ घर भइ काठमाडौं तारकेश्वर नगरपालिका–९ बस्ने ४५ वर्षीय विकाश भारती र गोरखा अजिरकोट गाउँपालिका–३ घर भइ काठमाडौं तारकेश्वर नगरपालिका–४ बस्ने ३७ वर्षीय बाबुराम अधिकारी हुन् ।

प्रहरीका अनुसार यी दुईमध्ये कुनै स्थायी ब्यापार वा जागिर नभए पनि सानदार जीवन शैली भएका रंगेली भारतीलाई केही वर्ष अगाडि वैदेशिक रोजगार ठगीको आरोपमा पक्राउ गरिएको थियो । विभिन्न व्यक्तिलाई आकर्षक तलब सहित अन्य मुलुक पठाइने आरोपमा भारती पक्राउ परेको प्रहरीले जनाएको छ ।

अढाइ दशकदेखि विभिन्न खाले कीर्तेमा संलग्न रहँदै आए पनि प्रमाण नरहने गरी ठगी गर्दै आएकाले उनी प्रहरीबाट बच्दै आएको एक अनुसन्धान अधिकृतले बताए । प्रायः जसो कारमा ओहोरदोहोर गर्ने उनी आफूलाई ठूलो कारोबारीको रुपमा चिनाउने गरेको प्रहरीले जनाएको छ ।

उनीहरू विरुद्ध बुद्ध एयरको हवाई टिकट खरिद–बिक्रीको अनलाइन कम्प्युटर प्रणालीमा अनाधिकृत पहुँच पुर्याई अवैध लाभ लिने कार्यमा संलग्न भएको प्रहरीले सूचना प्राप्त गरेको थियो । उपत्यका अपराध अनुसन्धान कार्यालय टेकुबाट खटिएको प्रहरी टोलीले काठमाडौं–९ गौशाला बत्तिसपुतली क्षेत्रमा उनीहरुलाई पक्राउ गरेको हो ।

प्रारम्भिक अनुसन्धानका क्रममा उनीहरूले अनलाइन प्रणालीमा अनधिकृत पहुँच प्राप्त गरी टिकट बिक्री र खरिदमा अनियमितता तथा धोखाधडी गर्न खोजेको खुल्न आएको छ । अब उनीहरूलाई विद्युतीय कारोबार ऐन, २०६३ अन्तर्गत आवश्यक अनुसन्धान र कारवाहीको लागि जिल्ला प्रहरी परिसर काठमाडौं पठाइएको छ ।

प्रकाशित : १२ चैत २०८१, मङ्गलबार 15:06