रक्सीले मातेर होस गुमाए पछि..

द नेप्लिज संवाददाता

३० माघ २०८१, बुधबार

विराटनगर– अधिकांश हत्याको कारणमा शत्रुता, जग्गाको झमेला, लेनदेन विवाद, अतिरिक्त वैवाहिक सम्बन्ध, प्रेम, बदलाको भावना र आवेशलाई मानिन्छ । तर, रुकुमपूर्वको एक गाउँमा रक्सीको झोकमा भएको अपराधले स्थानीयलाई शोक मग्न बनायो ।

रक्सीले कसरी मान्छेको विवेकलाई समाप्त पार्छ भन्ने बुझ्न मंगलबार दिउँसो भएको यो घटना नै काफी छ । स्थानीय एक पुरुषलाई मदिराको नशा चढे पछि एक नाबालक सहित दुई जनाको हत्या गरे ।

भूमे गाउँपालिका–४ साकिमका चन्द्रसिंह पुनले अत्यधिक रक्सी खाए । यतिबेलै छिमेकी ६० वर्षीया ढाँटी बुढासँग उनको सामान्य झगडा भयो । रक्सीको असरले नियन्त्रण गुमाएका उनले खुुकुरीले हजुरआमा बुढा र उनको ८ वर्षीय नातिलाई मारे ।

रक्सीले मस्तिष्कलाई धुमिल्याइदिएकोले हत्या गरेँ भन्दै हातमा खुकुरी लिएर ५३ वर्षीय चन्द्रसिंह भाग्दै थिए । यो डरलाग्दो दृश्यदेखेर स्थानीयबासीले ढिलो नगरी प्रहरीलाई सूचना दिए । ठूलो संख्यामा परिचालन भएका प्रहरीले उनलाई पछ्याइरहेको थियो ।

भाग्ने हत्तारोमा सन्तुलन गुमाएका चन्द्रसिंह भिरबाट लडेर खसे । आफैले बोकेको खुकुरी लागेर उनको मृत्यु भएको प्रहरीले भनेको छ । उनको जीवन समाप्त भयो । चन्द्रसिंहको शव नजिकै रगत लागेको खुकुरी प्रहरीले भेटेको थियो । बेस्सरी मदिरा खाए पछि चन्द्रसिंह चेतना शुन्यको अवस्थामा रहेकाले हजुरआमा र नातिको हत्या गरेको प्रहरीले जनाएको छ छ ।

प्रकाशित : ३० माघ २०८१, बुधबार 14:12