मनमाेहन कप क्रिकेट : कोशी प्रदेश विजयी

१६ वैशाख २०८२, मङ्गलबार

विराटनगर- एमएम कप फाउण्डेशनको आयोजनामा कोशी प्रदेशको राजधानी विराटनगरमा जारी तेस्रो संस्करणको मनमोहन स्मृति एकदिवसीय क्रिकेट प्रतियोगितामा कोशी प्रदेश विजयी भएको छ ।

मनमोहन अधिकारीको स्मृतिमा विराटनगरको वैजनाथपुरस्थित गिरिजाप्रसाद कोइराला अन्तर्राष्ट्रिय क्रिकेट रंगशालामा मंगलबार भएको समुह ´बी` अन्तर्गतकाे पहिलो लिग खेलमा आयोजक कोशीले नेपाल पुलिस क्लबलाई ३७ रनले पराजित गर्दै २ अंक जोडेको छ ।

टस हारेर ब्याटिङ गरेको कोशीले ५० ओभरको खेलमा २९ ओभर ३ बलमा सबै विकेट गुमाउँदै ९३ रनको सामान्य योगफल बनाएको थियो । कोशीका रुपक बरालले २१ रन बनाउँदा मिनस थापा र सुमन गहतराले समान १५–१५ रन बनाउनुबाहेक अरु ब्याटरले दोहोरो अंक जाेड्न सकेनन् । पुलिसका सुनिल दौल्यानले ८ ओभरमा २५ रन दिएर ५ विकेट लिँदा विपिन कार्की र चित्र विष्टले २–२ विकेट लिए ।

दास्राे इनिङ्गसमा ९४ रनको सामान्य लक्ष्य पछ्याएको पुलिसले २४ ओभर ५ बलमा सबै विकेट गुमाउँदै ५६ रनमा सिमित भयो । पुलिसका कुनै पनि ब्याटरले दोहोरो अंक जाेड्न सकेनन् । कोशीको जितमा प्लेयर अफ द म्याच प्रेम कामतले ९ ओभरमा १५ रन दिएर ५ विकेट लिँदा प्रकाश कार्कीले ३ विकेट लिए ।

बुधबार समुह ´बी` को दोस्रो लिग खेल आयोजक कोशी प्रदेश र भरतको आसाम क्लबबीच हुने आयोजक संस्थाका अध्यक्ष विप्लव घोषले जानकारी दिए ।

प्रकाशित : १६ वैशाख २०८२, मङ्गलबार 14:34